Ka National Youth Festival ka rynsan ba kyrpang ïa ki samla ban pyni ïa ki lad ki lynti bathymmai

Ka tnad ki Kam ïalehkai, hapoh ka jingïalam jong u Myntri sorkar pdeng ba dei khmih ïa ka Tnad kam ïalehkai bad Labour & Employment, Dr.Mansukh Mandaviya kan pynlong ïa ka Viksit Bharat Young Leaders Dialogue naduh ka 10-12 tarik Kyllalyngkot 2025 ha Bharat Mandapam, New Delhi. Ka prokram, kaba long ka jingpynkylla ïa ka National Youth Festival, ka thmu ban pynbiang ka rynsan ba kyrpang ïa ki samla ban pyni ïa ki lad ki lynti ba thymmai na ka bynta ka Viksit Bharat. Kan plie lad ïa ki samla nongïalam ban ïoh ïakren markhmat bad ki nongthaw polisi, ki riewpawkhmat jong ka pyrthei da kaba ai ruh ïa ki jing thmu jong ki ban saiñdur ïa ka lawei jong ka ri. Ki samla kylleng ka ri ki la ïashim bynta ha ki prokram bapher bapher ban pynshai ïa ki jingthmu jong ki na ka bynta ka Viksit Bharat lyngba ka jingïashim bynta jan 30 lak ngut ki samla.
Baroh ki don 3,000 ngut ki samla kiba la shah jied ban ïashim bynta ha ka Viksit Bharat Young Leaders Dialogue, hadien ka jingjied katkum ka jingwan shakhmat, ka jingjied ba bun bynta ba la saiñdur ban ithuh bad pyni ïa ki sur na kylleng ka ri. Ka rukom jied ka kynthup lai bynta. Ka bynta ba 1, ka Viksit Bharat Quiz, kadei ka sienjam online ba la pynlong kylleng ka ri kaba peit bniah ïa ka jingdon jingtip ki nongïashim bynta bad ka jingtip shaphang ki jingjop jong ka ri ha kine ki shiphew snem ba la leit. La pynlong ha 12 jait ki ktien ban pynthikna ba baroh ki ïoh bynta, la sakhi jan 30 lak ngut ki samla kiba ïashim bynta.
Ka bynta kaba 2, ka jingthoh Essay shaphang ka Viksit Bharat, kaba la sakhi ïa ka jingpynshai jong ki nongïashim bynta halor shiphew tylli ki phang pdeng ba kongsan kaba ïahab bad ka thong “Viksit Bharat.” Palat 2 lak tylli ki essay la aiti bad la peit bniah da ki riewshemphang ba la thung da ki kynhun sorkar jylla. Kaba khatduh, ka bynta kaba 3, ka Viksit Bharat State Vision Deck Challenge, ka ailad ïa ki nongïashim bynta ban pyni ïa ki jingthoh essay jong ki lyngba ka Power Point, ba la peit bniah da ki nongpynïaid katkum ka jingtbit jong ki ban ïalam bad ïatreilang.
Ki 3,000 ngut ki nongïashim bynta ba la shah jied ki kynthup 1,500 ngut na ka Viksit Bharat Track, ba mihkhmat ïa 500 tylli ki kynhun ba wan shakhmat na ka State Championships; 1,000 ngut na ka Traditional Track, ba la jied lyngba ki youth festival ha ki jylla bad ki prokram deiriti bad ki exhibition halor ki phang pdeng jong ka jingsaiñdur thymmai ha ka Science & Technology da ki samla; bad 500 ngut ki nongprad lynti, ba la shah khot namar ki jingnohsynniang jong ki ha shiphew tylli ki phang. La phah ïa ki nongïashim bynta da ki Myntri Rangbah bad ki Lat jong ki jylla/ UT bapher bapher, ban pyni ïa ki jingthmu jong ki ha Bharat Madapam, ka ban long ka jingïasohlang jong ka jingïalam lynti ki samla bad ka thong na ka bynta ka Viksit Bharat.
Ki mat ba kongsan ha ki sngi bapher bapher
10 tarik Kyllalyngkot, 2025 – ka jingplie paidbah ïa ka jingïakren ha ki phang bapher bapher, ki jingleit jngoh bad ka jingshem ïa ka deiriti.
Ka Viksit Bharat Young Leaders Dialogue 2025 kan sdang da ki prokram bapher bapher ha ka 10 tarik Kyllalyngkot, 2025. Ki nongïashim bynta kin ïakren halor ki phang bapher bapher bad ki jingïakob kiba phaikhmat halor 10 tylli ki phang pdeng ba la ithuh kiba long kumne harum:
Ka teknoloji na ka bynta ka Viksit Bharat Vikas Bhi VirasatBhi, Ka jingpynkupbor ïa ki samla na ka bynta ka Viksit Bharat. Ka jingkyntiew ka jingseisoh ha ki kam rep, ka jingpynlong ïa ka India ka jaka pdeng jong ka pyrthei na ka bynta ki startup, ka jingpynlong ïa ka India ka ri kaba khlaiñ ha ki kam ïalehkai bad ka jingkilan met, ka jingpynlong ïa ka India ka ri kaba khlaiñ ha ka kam pynmih mar, ka jingïalam ïa ka India sha ka lawei kaba ïaineh, ka jingtei ïa ki jingdon jingem na ka bynta ka lawei, ka jingpynkupbor ïa ki longkmie bad ka jingkyntiew ïa ki dak ha ka imlang sahlang,
Ha ka por shiteng sngi yn don ruh ki jingïakob bapher bapher, ba kynthup ka jingïakopdro, ka jingthoh, ka put ka tem, ki jingshad, bad ki poitri, kaba ailad ïa ki nongïashim bynta ban pynpaw ïa ki thong jong ki na ka bynta ka India kaba la kiew shaphrang. Shuh shuh, ki nongïashim bynta kin leitjngoh ruh ïa ki jaka kum ka Pradhanmantri Sangrahalaya, kaba pyni ïa ka jingïasoh ka histori jong ka ri bad ka rukom synshar.
Yn pynkut ïa ka janmiet da ka jingïabam ja lang ba la pynlong da ki Myntri Sorkar pdeng bad ki dkhot jong ka ïingdorbar thawaiñ Parliament. Kane ka kabu kaba kyrpang ka ailad ïa ki nongïashim bynta ban ïakren markhmat bad ki nongthaw polisi ha ka rukom kaba jai jai, kaba wanrah ïa ki jingïamir jingmut kiba don jingmut bad ka jingïatreilang ha ki kam kiba ïadei bad ka roi ka par. Kine ki jingïakren kin pyndap ïa ka jaka ba suda hapdeng ki jingangnud jong ki samla bad ki sienjam jong ka sorkar, ka ban kyntiew ïa ki jingïakren kiba nohsynniang sha ka jingkiew shaphang jong ka ri.
11 tarik Kyllalyngkot. 2025 – Ka sngi jong ka jingïamir jingmut bad ka jingrakhe ïa ka deiriti
Ka prokram kan sdang da jingïalang plie paidbah ban lamkhmat da u Myntri Sorkar pdeng ba dei khmih ïa ka Tnad Labour & Employment bad kam ïalehkai, Dr.Mansukh Mandaviya bad ka Myntri Khynnah jong ka sorkar pdeng ba dei khmih ïa ka Tnad Kam ïalehkai, Raksha Khadse lem bad ki kynrem ki lyndan na ka Tnad sorkar pdeng. Hadien kane, kan don ka Plennary Session ha kaba yn donlang ki riewpawkhmat kum u Anand Mahindra (Chairman, Mahindra Group) bad u Jonty Rhodes (u nongïalehkai Cricket). Kane ka jingsdang kan pynkhreh ïa ka kam, kaba plie lad ïa ki nongïashim bynta ban ïakren markhmat bad kine ki riewpawkhmat ki ban ai mynsiem bad pynshlur ïa ki ha kane ka jingïalang.
Hadien ka plenary session, ki nongïashim bynta kin leit sha shiphew tylli ki jaka ba la jied ha kaba yn don ki jingïamir jingmut halor 10 tylli ki phang pdeng ba la ithuh. Kine ki jingïamir jingmut, ban ïalam da ki nonghikai bad ki riewshemphang kum u S. Somnath, u Pawan Goenka, u Amitabh Kant, u Sachin Bansal, u Ronnie Screwvala, u Anand Kumar, u Ritesh Aggarwal, u Bhaichung Bhutia, ka Chavvi Rajawat, ka KalpanaSaroj, bad kiwei kiwei kin plié lad ïa ka jingpeit ïa ki kam ba kongsan kum ka jingïaineh, ka kam rep, ka jingpynmih mar bad kiwei kiwei.
Ka bynta kaba kongsan ha ka por janmiet kan long ka ‘Colours of Viksit Bharat’ ka prokram shaphang ka deiriti, ka jingrakhe ba iphuh iphieng ka ban pyni ïa ka jingriewspah ka pateng deiriti jong ka India. Ha kane ka prokram yn don ki jingïasoh jong ki bynta kiba ïadei bad ki rukom tynrai bad ki rukom ba mynta, ba pyni ïa ka jingïar ka deiriti jong ka India. Kane ka prokram kan pyni ïa ka jingngeit jong ka “Ek Bharat, Shreshtha Bharat” da kaba pyni ïa ka jingïar ka deiriti jong ka ri, ka jingïatylli, bad ka jingkiew shaphrang, kaba plié lad ban ïohi ïa ki rukom tynrai, ki rukom saiñdur bad ki jingngeit kiba long ka nongrim jong ka India. Naduh ki jingshad tynrai bad ka put ka tem hyndai haduh ki visual effect katkum ka juk mynta, kane ka prokram deriti kan pynïap bieit ïa ki nongïashim bynta, kaba long ka dak jong ka jingïasoh ka histori jong ka India bad ki jingthmu jong ka ri ban long ka Viksit Bharat.
Shuh shuh, ha ka 11 bad 12 tarik Kyllalyngkot, kan don ka Viksit Bharat Exhibition ka ban pyni ïa ki sienjam jong ki tnad sorkar jylla bad sorkar pdeng kiba phaikhmat sha ki samla. Kan don ki bynta ha kaba ki nongïashim bynta kin ïohi ïa ki lad kiba don ha ka pule puthi, ka jingkyntiew ïa ki sap, ka jingseng kam lajong bad ka deiriti. Ka State Exhibition kan pyni ïa ki sienjam na man ka jylla, katba ka Ministry Exhibition kan pyni ïa ki skhim jong ka sorkar kaba kyrshan ïa ka jingkyntiew ïa ki samla, ka jinglong nongïalam, ka jingsaiñdur thymmai bad ka jingïashim bynta ha ka jingïashim bynta ha ka jingai jingshakri ka Sorkar.
12 tarik Kyllalyngkot, 2025 – ka jingsaiñdur ïa ka lashai: ka jingpyni ki samla ïa ki jingthmu bad ka thong na ka bynta ka lawei jong ka India sha u Myntri Rangbah duh
Ka sngi kaba khatduh, ka 12 tarik Kyllalyngkot, kaba ju rakhe kum ka National Youth Day ban pyndonburom ïa ka lyngkhuh sngi kha jong u Swami Vivekananda bad ki kam ba sahnam jong u na ka bynta ka jingpynkupbor ïa ki samla, kan long ka por kaba kongsan na ka bynta man u nongïashim bynta. Kane ka sngi kan don ïa ka bynta kaba baroh ki angnud ha ka jingïalang. U Myntri Rangbah duh Narendra Modi un plie paidbah ïa ka Coffee Table Book kaba long ka thup jong ki jingthoh ba biang tam na man ki shiphew tylli ki phangpdeng ba la ithuh. Nalor kane, u Myntri Rangbah duh un pyllait ruh ïa ka Youth Anthem, ka jingrwai ba la thaw ban ai mynsiem bad pynïatylli ïa ki samla jong ka ri hapoh kawei ka thong jong ka jingkiew shaphrang ka ri bad ka roi ka par.
Kane ka sngi ka pyni ruh shiphew tylli ki jingpyni ïa ki kam kiba pyni ïa man ki shiphew tylli ki phang ba kongsan na ka bynta ka roi ka par jong ka India, ïa kiba yn pyni hakhmat jong u Myntri Rangbah Duh jong ka India.
Kane kan plié lad ïa ki nongïashim bynta ba kin ïakren bad u nongïalam ba halor tam jong ka ri. Kane kan plié lad ïa ki samla ba kin ïakren shaphang ki jingmut jong ki na ka bynta ka India kaba la kiew shaphrang ha kaba kan don ka jingsngew long trai bad ka jingbah khlieh ha ki samla.
Hadien kane, ka Grand Plenary Session, ba pynïaid da u Myntri Rangbah Duh kan long ka bynta kaba kongsan jong kane ka sngi. U Myntri Rangbah Duh un ai jingkren bad ai mynsiem ïa ki samla ba kin pynurlong ïa ka thong Viksit Bharat.