Shillong, Nailur 08: Ka Senior Christian Endeavour Society jong ka Balang Presbyterian Pynthor-umkhrah kan pdiang ïa ka National Convention ba la tip kum ka Triennial Convention of C.E. In India naduh ka 9 haduh ka 11 tarik mynta u bnai.
Ka Christian Endeavour ka dei ka Jingiaseng Samla kaba nyngkong eh ha ka pyrthei bad kumjuh ha ka Ri Khasi Jaiñtia. La seng ïa ka da U Rev. Dr. Francis Edward Clark ha ka 2 tarik u Rymphang ka snem 1881 ha Wiliston Congregational Church, Portland, USA. Ka la wan poi sha ri India 1883 ba la seng ha Udaril (Mumbai), Madurai bad Mandanapali. Nangta pat ha Ri Khasi la seng ha Balang Mawkhar bad Nongsawlia ha ka snem 1896.
Kane ka National Convention ka long kaba nyngkong eh ban long ha Meghalaya kum ka jylla ba pura bad kaba ar kaban wan ha Shillong hadien 66 snem ba la pdiang da ka Mawkhar Church C.E. Union ha ki tarik 10 haduh 13 u Jymmang,1956.
Kin don kumba 350 ngut ki delegates kiban wan na kylleng ka ri India kynthup ia ki nongmihkhmat na ka World Christian Endeavour Union. ïa ka Jingiaseng Plie ïa ka Convention yn pynlong ha ka 9 tarik ha ka por 2:00 PM ha kaba U President jong ka C.E. In India U Rev. Dr. John Bashkar un kyntiew ia ka lama. Kan don ruh ka jingpyllait ia ka kot “SAHKYNMAW” da U Myntri Rangbah ka jylla, Shri. Conrad Sangma uba long u Kongsan.
Ha kane ka Convention kin don ki program bapher bapher kum ka Cultural Programme, Musical Night, Carol Singing bad kiwei kiwei na lor ki jingïaserng paidbah. ïa ki Jingiaseng baroh man la ka janmiet yn pynlong ha ïingmane bad phyllaw ïingskul hynrei ha ka Sngi U Trai ha ka por 10:00 AM bad 1:00 PM yn pynlong ha Madan Polo. Kin don ki jingrwai kyrpang na ki CE in South India, North India, NEICE Union, KJP Synod Sepngi, Ribhoi Presbyterian Synod CE Unuion, Mawkhar Church CE Union, Mawprem CE Society, Jowai CE Society, Pynthorumkhrah CE Society bad kiwei kiwei.
Ki nongkren ha kine ki jingiaseng ki long: 9 tarik u Nailur por 6:00 PM – Rev. B.B. Lamin (Moderator P.C.I) , 10 tarik por 6:00 Pm- Rev. A. Thapa, 111 tarik por 10:00 AM – Rev. S.K. Sahu (Vice President, World CE Union), 1:00 PM – Rev. G.P.L. Gadew bad 5:30 PM – Rev. Babu Rao (Vice President of Madras Diocese C.E. Union).
Ka Balang Pynthorumkhrah ryngkat bad ka Senior C.E. Society ka khot sngewbha ia ki para Endeavourer bad ki para bangeit ban wan sha kane ka jingiaseng. Na ka bynta kito kiba wan ha ka Sngi U Trai, ka jak pynieng kali kan long ha Parking Lot marjan bad ka jaka long JIngiaseng.
