Shillong, Jylliew 2: Ka Nangkiew Irat kan sa ïakhun pyrshah bad ka Mawlai ha ka sngi sdang jong ka samoi ïalehkai Officer’s Choice Blue Shillong Premier League 2021-22 kaban sdang ha ka 15 tarik Jylliew.
Hadien ar snem na ka jingbym don ka jingïalehkai SPL na ka daw ka jingshah pynthut ha ka khlam jingpang Covid-19, kane ka lympung ïalehkai league ba hehduh hapoh ka jylla Meghalaya kan sa wanphai biang ha madan Polo, Shillong.
Bad na ka daw ka jingshna pynbha ïa ka JN Stadium bad ban siang ïa ka madan football First Ground jong ka SSA ha First Ground, ïa ka leg ba nyngkong mynta ka samoi yn pynïalehkai ha madan Third Ground jong ka MFA bad baroh ki jingïalehkai yn sdang ha ka por 4 baje janmiet.
Na ka liang ka Shillong Sports Association (SSA) ka la pynbna ruh hadien ka jingïateh kaba ar snem bad ka Officer’s Choice Blue mynta ka la ïasoi biang kum ka nongbei tyngka na bynta kane ka samoi SPL 2021-22 ha kaba mynta ka samoi ka kynhun lahduh kan khur ïa ka song pisa ba T. 3 Lak ïa kaba la kyntiew sha ka 50 percent.
Ka Shillong Lajong ka dei ka lahduh saw sien jong kane ka lympung. Ka Rangdajied United ka wan ba ar ha u 2019, ka Langsning arsien, ka Ryntih bad ka Nangkiew Irat baroh ki wanphai biang ha kane ka samoi ïalehkai na ka samoi ba lah dep, katba ka Malki ka la wanphai biang sha kane ka lympung ba heh duh hadien ba ka khlem ïalehkai shuh naduh u 2018.
Kiwei pat ki team ki kynthup ïa ka Mawkhar bad Mawlai. Ka Mawkhar ka jop ïa ka First Division 2019, katba ka Mawlai ka wan ba ar. Ka Mawlai ka la wanphai sha ka SPL ha ka sien ba nyngkong naduh u 2013.
Kumba long ha u 2019, ha kane ka samoi ruh ïa ka jingïalehkai yn pynlong da ka league khlem ka playoff lane ka final. Hadien ar tylli ki leg ba ki kynhun ki mih madan mar 14 sien bad 56 sien jong baroh ki jingïalehkai, ka team ba khur bun point kan ïoh ban khur ïa ka nam lahduh.
Hadien ar snem khlem ka jingïalehkai, ki player ki da thrang ban ïoh mih madan noh bad ba ki nongkyrshan ruh ki angnud ban wan ban sakhi ïa kane ka lympung. Hynrei, ban pynduna ba ki paidbah kin wan ha Third Ground, ki nongpynïaid ki la shim ka sienjam ha kaba ïadei bad kane ka lympung ban pyni live mynta u snem lyngba ka T7 khnang ba ki paidbah kin ïoh ban peit la hangno hangno ba ki don.
