Ka Murmu, ka Riewlum ba nyngkong eh ban long President jong ka ri India

New Delhi, Naitung 21: Ka Draupadi Murmu, ka la jop ïa ka elekshon jied President ban long ka President ba khynnah tam jong ka ri India ha ka liang ka rta. Kane ka kyrtong jong ka BJP kan la dap 64 snem ka rta kan long ruh ka Riewlum ba nyngkong eh ban bat ïa ka shuki President bad ka kynthei kaba ar hadien ka Pratibha Devi Patil.
Ka Murmu kaba la pylliem ïa u Yashwant Sinha, u kyrtong jong ki Liang Pyrshah, kadei ka President ba nyngkong eh ban kha hadien ba ka India kala ïoh la ka jong ka jinglaitluid.
Kane ka longkmie ka la dei ka nongmihkhmat sha ka Members of Legislative Council (MLC) jong ka Odisha bad kumjuh ruh kum ka Governor jong ka Jharkhand.
Ïa ka Murmu yn pynsmai kum ka President ba 15 jong ka ri India haka 25 tarik mynta u bnai.
La ïathuh ba kane ka longkmie kadei ka briew kaba leh rit kaba khlaiñ bha ka jingngeit niam jong ka, hynrei kaba lah pat ban shah ïa ki jingeh. Ki khubor ki ïathuh ruh hapdeng 6 snem ka la duh noh ïa u lok, arngut ki khun, nangta ka kmie bad u para namar ka jingkhlad noh jong ki.
Na Meghalaya, ka Murmu ka la ïoh jingkyrshan na ki 47 ngut na ki 56 ngut ki MLA ba wan thep vote. U Yashwan Sinha pat 8 ngut. Kawei ka vote ka long Invalid ne ka shah kyntait.
Na ka liang u Myntri Rangbah ka jylla, u Conrad Sangma, ha kaba ka kynhun Liang Synshar MDA ka la ai ka jingkyrshan ïa ka Murmu, u la pynpaw ka jingsngewkmen bad ai khublei ïa ka President ba thymmai jong ka ri bad ong ruh ba kadei ka khep jong ka jingsngew sarong bad sngew shngaiñ jong ki riewlum ha ri India hi baroh kawei.