Ka MRSSA kaba paka tam ban khanglad ïa ki mynder katba dang buddien ïa ka ILP : Bah Metbah

Shillong, Jylliew 18 : U President ka United Democratic Party, Bah Metbah Lyngdoh ha ka sngi Balang u la ong ba ka sorkar jylla haduh mynta ka dang buddien na ka sorkar pdeng haba ïadei bad ka jingdawa ban pyntreikam noh ïa ka Inner Line Permit (ILP) ha ka jylla.
Ha ka jingïakren bad ki lad pathai khubor, u Bah Metbah u la pynkynmaw ruh ba baroh 60 ngut ki MLA ki la dep ban mynjur da ka Resolution ha Iing Dorbar Thawain ka jylla halor kane ka mat bad phah ruh sha ka Sorkar India na ka bynta ban ïoh ïa ka jingmynjur.
Nangta u la ïathuh ba na ka liang u Myntri Rangbah kumjuh ki Myntri ka sorkar jylla haduh mynta ki dang ïai buddien na ka sorkar pdeng na ka bynta ban ïoh noh ïa ka jingmynjur.
Haba jubab halor ka jingkylli, u ong ba ki lah ban don katto katne ki bynta kiba lah ban tyngkhuh bad ki aiñ ka India kiba pynlong ïa ka sorkar pdeng ba kan shim por ban mynjur.
Tangba, u ong pat ba ïa kane ka bynta donkam ban pynbeit noh lada ka don kum kita ki jingwit.
“Ka lah ban don kaei kaei kaba wit kaba pynlong ïa ka sorkar pdeng ba kan peit bniah ïa kata ka bynta,” u la ong.
Katba ka jingdawa ILP ka dang ïaid, na ka liang u Bah Metbah u la ong ruh ba ka Meghalaya Residents, Safety and Security Act (MRSSA) kan dei kaba paka tam ban khanglad ïa ki mynder ban ïoh rung suk sha ka jylla.
U ong ruh ba lada ïa kren ïa ka MRSSA u don ka jingngeit ba ka jingpyntreikam ïa ka, kan lah ban tehlakam bad ïarap ban khanglad ïa ka jingwan ki mynder.