Ka Mini Secretariat bad Circuit House dei ki kam pynroi ba ryngkat bad ba longpdeng, ong u Conrad

Shillong, Risaw 28 : U Myntri Rangbah ka Jylla Conrad K Sangma ryngkat u Symbud Myntri Rangbah Bah Prestone Tynsong ki la plie paidbah ia ka Mini Secretariat, ka Circuit House bad kumjuh ruh ia ka ophis treikam ba thymmai jong ka Block Integrated Development Complex, Pynursla ha ka jingialang kaba heh bad shongkun bha kaba long ha Pynursla.
La donlang ruh ha lane ka sngi naduh u Myntri ka tnad Arts and Culture ka sorkar jylla Bah Sanbor Shullai, MLA ka Sohra Bah Gavin Mylliem, nangta u Chief Secretary Dr. P Shakil Ahamed, CV Diengdoh Commissioner and Secretary ka sorkar jylla, MDC ka Nongshken Kong Grace Kharpuri, Bah HM Shangpliang Adviser ka sorkar jylla, SDO ka Pynursla Sub Division Kong E Warjri, Sordar ka Raid Shabong nalor kiwei kiwei.
Haba kren ha kane ka sngi, u Myntri Rangbah u la ïaroh ïa ka jinglah ban pyndep ka jingtei ïa kine ki 2 tylli ki project, da kaba ong ba kidei ki kam jingïohi jngai bad ki jinglah jong ka sorkar, ka jinglong pdeng ka kam synshar khaddar bad ka jingshakri kaba bha tam ïa ki paidbah.
“Ka Mini Secretariat bad ka Circuit House ka Pynursla ki long ka dak jong ka jingangnud ka sorkar ban wanrah ki kam pynroi kiba ïaryngkat bad ka jinglong pdeng ka kam synshar khaddar,” u la ong.
“Ngi kwah ka rukom treikam ha kaba ki nongshong shnong kim donkam shuh ban mareh na kawei ka ophis sha kawei pat na ka bynta ki kam shakri kiba kongsan. Ka thong jong ngi ka long kaba suk- ka synshar kaba bha bad ka kam shakri kaba lah ban poi shaduh ki thliew ïing jong ki paidbah.”
Haba kren ïa ki kyntien jong nongthoh Shiv Khera halor ka jingleh ïa ki kam ha ka rukom bapher bapher, u la ong, “Haba ngi sdang ha u snem 2018, ka jingpyndonkam ïa ka MGNREGS ka dang long duna ban ïa ka T. 500 klur. Mynta ka la kynjoh la jan T. 2,000 klur-ym namar jong ki skhim ba thymmai, hynrei namarba ngi pyntreikam ïa ki ha ki rukom bapher bapher. Ïasynriem ruh hapoh ka Pradhan Mantri Awas Yojana, ha kaba mynshwa ngi ïohpdiang kumba 4,000 haduh 5,000 hajar tylli ki ïing ha ka shi snem, hynrei mynta ngi la kynjoh sha haduh 1.5 lak tylli ki ïing ha ka shisnem.”
Haba batai ïa ka jingmut shalyndet ka Mini Secretariat, u Myntri Rangbah u la ong, “Ka jingmut ka dei kaba suk. Ngi kwah ïa kawei ka dukan ba hap ban sangeh, ka rukom treikam ha kaba ki paidbah kim donkam ban leit na kawei ka ophis sha kawei pat. Baroh ki tnat ha ka kyrdan Sub-Division kin treikam hapoh kawei ka tnum ban ai jingshakri kaba sted bad kaba bha bad ïaid beit ïaid ryntih. Ka jingïohi jong nga ka long ha ki lawei ban wan, u briew u lah ban aiti ïa ki kot ki sla ha ki ophis treikam kiba marjan bad ban wan biang hadien shi taïew lane hadien 10 sngi kan shim ïa ki, ha ka jaka ban ïaid ne leit sha jngai shaduh sha ophis DC.”
U la pynpaw ka jingïaroh ïa ki bor pynïaid shnong halor ki jingïatreilang jong ki, kyrpang ïa ka Raid Shabong ba ka la ai kylluid mynsiem ïa ka jaka na ka bynta kane ka projek.
“Kane kam dei tang ka shi lyngkhot ka jaka- ka dei ka khubor ïa baroh kawei ka jylla ba ki shnong bad ka sorkar ki lah ban ïatreilang na ka bynta ka jingbha kaba khraw. Kaei kaba phi la leh mynta ka sngi yn sah kynmaw hapoh ka khana pateng kum ka jingai sngewbha ïa ki briew jong phi, kawei ka ban ai ka jingshakri ïa ki pateng ban wan.”
U la pynpaw ruh ka jingïaroh ïa ki jingpyrshang jong u Symbud Myntri Rangbah da kaba ong, “Hapoh ka jingïalam jong u Symbud Myntri Rangbah jong ngi, ki jingbteng ban tynruh bad ka jingaiti ïa kane ka thaiñ jong u bad ki paid la jong, la pynlong ïa kane ka project kaba la lah ban pynurlong. Ka jingpyndep bad ka jingtrei kaba biang ka la long shisha kaba janai.”
“Ngi dang pyrkhat ban leh lang kumjuh ne shim ïa kane ka juh ka jingpynwandur (design) na ka bynta jong baroh ki Mini Secretariat ha kylleng ka jylla khnang ba ki paidbah tang mar shu peit kin lah ban ithuh ïa ki kum ki center jong ka synshar khaddar bad ka jingai jingshakri,” u la bynrap.
Ha kawei ka liang, u Symbud Myntri Rangbah u Bah Prestone Tynsong, ha ka jingkren u la pynpaw ka jingai khublei ïa u Myntri Rangbah ba u la buh hakhmat eh ïa ka Pynursla haba ïadei bad ki kam pynroi jong ka jylla bad ai ruh ka jingïaroh ïa ka jingïatreilang jong baroh ba la lah ban pynlong ïa kane ka project kaba lah ban pynurlong.
“Kane kan hiar shaduh ka khana pateng jong ka Pynursla Civil Sub-Division,” u la kynthoh.
Na ka liang u Bah Sanbor Shullai pat u la ong ba ki paidbah kim dei satia ban shet kylla ne haram ia kiba leh bha. U ong ruh ba lada ym dei na Bah Prestone ka thain Pynursla kan ym pat ioh ia ka Mini Secretariat wat hadien 53 snem ba ioh la ka jong ka jylla lane wat hadien 100 snem ruh. “Kumta wat ju shet kylla ia kiba leh bha. Wat ha constituency jongnga kim ju shet kylla ki tieng namar ki ngeit ba lada shet kylla ia kiba leh bha ia ki kan sa kyrtoh kylla ia ki hi,” u la ong.
Kiwei kiba la donlang ha kane ka prokram ki kynthup ïa u Chief Secretary ka sorkar Meghalaya u Dr. Shakil P. Ahammed, u MLA ka Sohra Constituency u Bah Gavin M. Mylliem, Commissioner and Secretary CVD Diengdoh, u nongaibuit ka sorkar jylla u Bah HM Shangpliang, ki nongïalam shnong bad kiwei ki heh ki haiñ kiba la shah khot sngewbha.