Nongstoiñ, Rymphang : Ka jingkoit jingkhiah ka dei ka spahbah kaba kongsan tam ha ka jingim jong u briew hynrei napdeng ki nongshong shnong hapoh ka jylla lajan manla kawei pa kawei ka longïing ki ïakynduh ïa ki jingpang jingshitom manla ka por, la ki dei ki jingshitom kiba malu mala lane ki jingshitom kiba jur kiba la hap ban leit pynkit sha ki jaka sumar kiba pher bapher. Ka Meghalaya Health Insurance Scheme ka dei kawei na ki skhim sorkar kaba la wanrah ka jingkyrkhu bad jingmyntoi kaba khraw ïa ki paidbah nongshong shnong jong ka jylla.
Ka MHIS card ka la ïarap shikattdei eh ïa ki longïing longsem kiba duk ba kyrduh bad ka la pynsngewshngaiñ ïa ki nongthiah pang ha ki jaka sumar. Hadien ba ka sorkar ka la kyntiew shuh shuh ïa ka jingïarap sha ka san lakh tyngka. Ha ka jingwad jingtip jong u nongthohkhubor lyngba ki nongtrei ha ka tnad ka koit ka khiah hapoh West Khasi hills ha kaba ïadei bad ka jingkyntiew kyrteng na ka bynta kane ka skhim, la lap ba ka duna bha bad kam pat kot marshiteng na ka jingdon briew hapoh ka district. Kumta na ka liang ki bor pynïaid district ki la kyntu ïa ki paidbah ba ki dei ban mih shakhmat ban pynrung kyrteng ïalade bad ki dkhot jong ka ïing na ka bynta ban ïoh ïa ka MHIS card khnang ba kin lait na ka jinglutksan ha ka por ba ki leit shah sumar ha ki jaka sumar.
