SHILLONG, Jylliew 02: U President ka Meghalaya Football Association u Bah Hamletson Dohling u la pynpaw ba ka synjuk ka angnud shisha ban ïohi ba ki khynnah samla jong ka Jylla Meghalaya kin kiew ha ka phutbol bad ban ïohi ba ki ïalehkai ha ka Indian Super League [ISL].
ïa kane u la Bah Hamlet u la kren ha ka jingïalang kaba la pynlong kyrpang na ka bynta ka kynhun ïalehkai U-20 jong ka Jylla ka ban sa leit shim bynta ha ka Elite Training Camp kaba 20-sngi ha Olympique Lyonnais’ Academy, France.
Haba ai jingkren ha katei ka jingïalang u Bah Hamlet u la ong, “Ban phah ïa ka kynhun kaba dang samla shabar ri ka dei ka kam kaba khraw bad ka khyllipmat kaba sah jingkynmaw ïa ka Jylla. Phi ki khynnah shynrang phi long kiba donbok shibun ban ïoh ïa kane ka lad ban shah hikai ha France. Ka dei ka rynsan ban saiñdur ïa ka lawei jong phi”.
U la bynrap ruh ba ka MFA ka kwah ban ïohi ïa ki rangïalehkai ba kin kiew shaphrang naduh ka kyrdan ba rit haduh ka kyrdan ba heh bad ba kin poi sha ka lympung ISL.
Lah ban kdew hangne ba ka Meghalaya ka la ïai bteng ban paw bad seisoh bha ha ka kyrdan jong ki khynnah samla hynrei kane kam shym la long ka jingjop kaba neh haduh ki kyrdan jong ki rangbah; haba ïanujor bad ka Manipur bad ka Mizoram, ki don tang katto katne ngut ki nongïalehkai na kane ka jylla ha ka ISL, bad kane ka la pynlong ïa u President ka MFA ban buh jingkylli ryngkat ka kyntu kynpham ïa ka kynhun ba kin trei shitom bad ban pyndonkam hok ïa ka kabu kaba ki ïoh.
“Ka MFA ka kwah ban ïohi ïa ki player kin kiew shaphrang naduh ka kyrdan ba dang rit haduh ka kyrdan ba heh bad ban poi sha ka ISL. Lada ka Manipur bad ka Mizoram ki lah ban pynmih 40 haduh 50 ngut ki rangïalehkai ha ka ISL..te balei ka Meghalaya kam lah? Phi lah ban leh, ym tang na ka bynta jong phi hynrei ban wanrah ïa ka burom ïa ka jylla.”
U Bah Hamlet u la ai khublei ruh ïa u Myntri Rangbah bad ka sorkar jong u na ka bynta ka jingkyrshan kaba bteng ban kyntiew ïa ka phutbol ha ka jylla, kaba la pynlah ïa ka MFA ban pynlong ïa ki lympung phutbol na bynta ki samla bad ïa ka senior men’s Meghalaya State League. Ha kane ka sngi u la pynbna ruh ba ka lympung ïalehkai phutbol jong ki kynthei ba nyngkong eh jong ka MFA kan sdang ha u bnai Nailar.
