Mawkyrwat, Jymmang, 08: Ka Seng Samla Shnong Umjaraiñ ha ryngkat ka jingïatreilang bad ka Synjuk ki Seng Samla Shnong jong ka South West Khasi Hills District, ha ka 07/05/2022 ki la pynlong ïa ka Awareness Programme-cum-Cleaning Drive bad ha kane ka sngi la pynïaid ïa ka jingïalang ba lyngkot da u President ka Seng Samla Shnong Umjaraiñ, u samla K. Lyngdoh.
Ha kane ka sngi la ïoh jingkren na u Myntri Shnong Umjarain u ba la kyntu ïa baroh ki nongshong shnong ba kin ai ka jingïatreilang bad ka Seng Samla Shnong na ka bynta ban wanrah ïa ka khuid ka suba hapoh shnong ‘poh thaw bad kumjuh ruh ïa ka ïew Umjaraiñ baroh kawei. U la ai ruh ïa ka jingïaroh ïa ka Seng Samla Shnong Umjaraiñ kaba la shim ïa kane ka bynta ryngkat ka jingkyntu ba kin nang trei shitom ban wanrah ïa ka jingbha ha ka imlang sahlang.
U bah Definetis Dkhar, Environmental Secretary (ES) ka Synjuk ki Seng Samla Shnong, South West Khasi Hills District u la ong ba ka mei mariang ka long kum ka kmie jong ngi kaba U Nongthaw U la buh lut ha ka ïa ki jingdonkam baroh jong u khun bynriew, namarkata, ka mei mariang ka donkam ïa ka jingsumar jong ngi ym ban pynjot ïa ka. U la ong ruh ba dei ban long kiba lehkhuid ha baroh ki liang bad ban nym leh i-beiñ ïa ka mei mariang da kaba bret pathar ïa ki jaboh jabaiñ khnang ban lait na ki jingshitom ba bun jait. Khamtam ban sumar ïa ki um ki wah ban nym pynjaboh ïoh ha kawei ka por kin kylla kum ka wah umkhrah.
U la pynpaw ka jingsngewkmen ïa ka jingpynlong ka Seng Samla Shnong Umjaraiñ ïa kane ka Cleaning Drive, namar u la ong ba ka Sorkar India naduh Delhi ka hap ban hikai bad bthah ïa ki nongshong shnong lyngba ka Swacch Bharat Mission ba long kiba lehkhuid da kaba buh ruh ka jingkylli hato ma ngi kum ki nongshong shnong ka umjaraiñ kim nang mo ban sumar khuid ïa lade bad ka mei mariang.
U la ong ruh lehse ka Seng Samla Shnong Umjaraiñ ka ïohi ba dang don ki ba bret pathar ïa ki jaboh jabaiñ ha ki jaka paidbah, ha ki um ki wah ki bym pat kheiñ kor ïa ka jingsumar khuid ïa ka shnong ka thaw bad ka ïew ka hat bad dei na kane ka daw lehse ka Seng Samla ka pynlong ïa kane ka program ba dei por eh.
U bah Kitborsing Lyngdoh, General Secretary ka Synjuk ki Seng Samla Shnong, SWKHD u la ong ba ka lynti ban poi sha ki hajar mer ka sdang na i sienjam ba nyngkong. Kumta ka jingpynlong ka Seng Samla Shnong Umjaraiñ ïa kane ka jingpykhuid shnong kan long ka jingsdang na ka bynta ban nang kynjoh shuh shuh ha kiba bun ki mawmer ban wanrah jingkylla khamtam ha kaba ïa dei bad ka khuid ka suba ha ka shnong ka thaw.
U la pynpaw ba ka Synjuk ki Seng Samla Shnong, SWKHD ka kloi ban ai ka jingïatreilang bad ki Seng Samla Shnong ha ki kam ban wanrah jingbha ha ka imlang sahlang ban thaw ki lad jingïarap katba kot bor. U la ong kumba ka jinglehkhuid ha ka jingim jong ngi ka long kaba donkam ba kin ïoh ïa ka jingkoit jingkhiah, kumta ruh ka mei mariang ka donkam ïa ki ba kin sumar lem ïa ka habaroh ki liang.
Ha kajuh ka por u la pynkynmaw ruh ba baroh ki shnong hapoh ri khasi ki don la ka jong ka jingkyrkhu kyrpang U Nongthaw, ka Shnong Umjaraiñ ruh ka dei ka shnong ba U Nongthaw U la kyrkhu kyrpang nalor ka jingitynnad jong ka khamtam lei lei ka jingdon ka Umshit lane ka Hot Spring. Namarkata, u la kyntu ïa ki paidbah ki nongshong dukan ba kin sumar khuid ïa ka shnong, ka ïew Umjaraiñ ban nym pyntuid ïa ki um jaboh sha ka ka wah kaba don marsyndah bad ka ïew bad ban da shna ruh da ki soakpit kumba ki la shna ha ki ïing jong ki lyngba ka jingïarap ka sorkar namar watla ki hap ban lut ar ne lai hajar ruh hynrei kan long ka jingïada ïa kane kawah na ka jingjaboh.
U pynkynmaw ruh ba dei ban pynduna bad pyndonkam biang (Reduce, Reuse, Recycle) ïa ki pla plastik bad ki mar plastik kiba long ka daw bah jong ka jingsatah ki jaboh ki jabaiñ ha ki shnong ki thaw bad ki ïew ki hat. U la ong ki paid bah nongshong shnong ka Umjaraiñ kin ïoh shuh shuh ki jingkyrkhu nalor ba ki la don lypa ha ka map jong ki jngohkai ba pawnam da ka jingdon ka hot spring ne umshit lada ki lah ban pynrung sa ïa ka shnong Umjaraiñ kumka Shnong ba khuid tam ha Ri India ne wat ha ka pyrthei. U la ong ka por ka dang biang ba kin pynurlong ïa kane bad kan sa long ka jingkyrkhu bakhraw.
U la pynkynmaw ruh ba kum ki briew hooid ki hap ban pyndonkam ïa ki jingdon jingem ha ka mei mariang namar ki hap ban pyndap ïa kiba bun ki jingdonkam, hynrei ki dei ban pyndomkam da ka jingstad khnang ban nym pynjot ïa ka mei mariang bad khnang ba kan nym long ka jingtim ïa ki pateng ban wan.
