Ka mei mariang ïa ngi ka la bsa, dei pat ka kamram jong ngi ban ïada ne sumar ïa ka:KSU

Mawkyrwat, Jylliew 07: Ka Khasi Students’ Union (KSU) jong ka Phlangmawprah Area Unit kum shibynta ban ïasnohkitlang ha ka taïew ba kyrpang jong ka jingpynneh pynsah ïa ka mei mariang kaba la rakhe ha kylleng ka pyrthei, mynta ka sngi ka 7 tarik u bnai Jylliew, 2022 ka la ïoh ban rakhe da kaba pynlong ka jingïalang ba lyngkot hapoh ka Esskay Secondary School Phlangmawprah, South West Khasi Hills District bad kumjuh ruh ka jingthung ïa ki tynrai dieng.
Ha ka jingïalang ba lyngkot, u Environment Secretary jong ka KSU South West Khasi Hills District, u Plosborlin Kharjahrin ha ka jingkren jong u kum u kongsan u la ong ba ka jingthung ïa ki tynrai dieng ban pynjyrngam ïa ka mei mariang bad ka sawdong sawkun kam dei ban long tang ha ka 5 tarik u bnai Jylliew hynrei ka dei ban long manla ka sngi namar ka jingpom pathar ïa ki dieng ki siej ha kine ki sngi ka la long kaba shyrkhei bad ka jinglong jong ka mariang ruh ka la kylla katba nang mih ki sngi ïa kaba tang na ka jingshit ruh la sngewthuh lypa.
U la ong ruh ba ha kine ki thaiñ ki don ki jaka kiba itynnad bad kiba lah ban khring ruh ïa ki nongwan jngohkai pyrthei, hynrei lada kim nang ban kunai ne tyngkai lypa ïa kiei kiba don sawdong kum ki dieng ki siej kiba pynjyrngam bad kiba ai ïa ka jingitynnad bad ka lyer kaba khuid kan sa long leh noh ei.
Ha kaba ïa dei bad ka jingbret pathar ïa ki plastik bad ki jakhlia jakhlaid ha ki rud ki kiar ka long kaei kaei kaba pynjah burom ïa ki shnong ki thaw, kumta kaba donkam mynta ka long ba kum ki nongshong shnong ki dei ban don ïa kata ka jingkitkhlieh na lade ym ban shu shaniah tang ha ki nongïalam shnong ba kin pynkhuid ne tam ïa ki hynrei ka dei ban don ka jingïatreilang bad jingïasngewthuh jingmut da kaba sdang shwa na la ïing.
“Lada ki nongshong shnong jong ka shnong Mawlynnong ki la ban pynïoh ïa ka nam ka burom lyngba ka jingkhuid jingsuba kaba la paw wat ha pyrthei baroh kawei, kan eh aïu ïa ngi pat ban leh ïa kata ban pynkhuid ïa ki shnong ki thaw bad ki sawdong ki sawkun”, u la ong bad ban leh ïa kata ka donkam ïa ka jingkitkhlieh bad khamtam eh ka jingïasnohkitlang jong iwei pa iwei i nongshong shnong naduh ki hep kiba rit haduh kiba la heh la san.
U la ong ruh ba hooid ka sorkar ka buh ïa kum kine ki sngi ba kyrpang ban pynneh pynsah ïa ka mei mariang bad ban pynkhuid ïa ki sawdong sawkun kum ïa ka um bad ka lyer kaba ngi ki briew ju pyndonkam hynrei ka long kaei kaei kaba sngewsih ba hapdeng kata ka jingïakhun ka ai jingbit pat ban shna ïa kita ki karkhana kiba pynmih ïa ka tdem bad ka lyer ba jakhlia kum ki Coke Factory kiba paw mynta ha Jaiñtia bad ha Shahlang bad wat ha ki thaiñ jong ngi ha Nongjri ruh kiba wanrah ka jingsniew dur ïa ka mei mariang la ka long ha kaba khlong ïa ki marpoh khyndew ne pynjakhlia ïa ka lyer.
Namarkata, u la kyntu bad buh ka jingkyrpad ïa baroh ba ka la dei ban por ïa ki ba kin kyndit thiah, kylla dem namar noh ban kylla na kaba pynjot pathar ïa ka mei mariang khnang ba ka pateng ka ban sa wan kan nym mat ïa ki men sniew kiba bun rukom da kaba kin kyndit bynriew noh ban leh ei ei da kaba wanrah biang ïa ka mariang kaba khuid ba suba bad ka jyrngam da ki dieng ki siej.
Ïa ka jingïalang la pynïaid da u Spaidarwell Thongni, President ka KSU Phlangmawprah Area Unit, ka jingkren pdiang na u babu G. Thongni, Headmaster jong ka Esskay Secondary School Phlangmawprah.
Kiwei pat ki nongkren ki long u Dusterwell Kharlyngdoh, Finance Secretary jong ka KSU South West Khasi Hills District, ka samla Shabanri Kharraswai, President KSU Girls Wing Mawkyrwat Circle bad ka jingkren khublei na u Milanstar Nonglang, Environment Secretary ka KSU Phlangmawprah Area Unit.