Ka Meghalaya kan sa phai dien trai biang lada ki paidbah ki jied ïa ka AITC ha u 2023: Prestone

Shillong, Nohprah 14 : U National Vice President ka NPP bad Symbud Myntri Rangbah ka Jylla Bah Prestone Tynsong mynta ka Sngi Balang ula ong ba ka Jylla Meghalaya kan sa phai dien trai biang ne kan hiar arsut lada ki paidbah ki jied ïa ka All India Trinamool Congress (AITC) ha u 2023.
Haba ïakren bad ki lad pathai khubor ula pynpaw ba um ïohi satia ba ka jingwan jong ka Myntri Rangbah ka West Bengal kaba dei ka Chairperson jong ka AITC ka Mamata Banerjee kan nang pynkhlai ïa kane ka party ha ka jylla hynrei kan dang pyntlot pynban ïa ka jingkhlai jongka AITC.
Haba kylli, u Bah Prestone ula ong ba ka jingkylla kan wan beit lada ka AITC ka shah jied ban shimti ïa ka bor bad kane ka jingkylla ka long “Ngin sa hiar arsut bad phai dien trai biang lada ki paidbah ka Jylla Meghalaya ki bakla bad kyrshan ïa ka AITC, ai ba ngan kular ha phi ba kane ka mut ba ka Meghalaya ha ka jaka ba kan kiew shakhmat, ngin sa nang ïaid shadien. Kane kan sa jia bad ngam don jingartatien satia ïa ka” ula bynrap.
U Symbud Myntri Rangbah ula ong ba kane ka Chairperson ka AITC kam pat tip bha shaphang u Myntri Rangbah barim ka Jylla Dr Mukul Sangma. “Ka Mamata Banerjee kam pat tip bha shaphang u Dr Mukul hynrei u Bah Prestone u tip lut ïa baroh ki jinglong u Dr Mukul. Phra snen u shong ha ka shuki bad baroh ki lad pathai khubor ki tip bha shaphang jong u” ula ong.
Halor ka jingkam ka Mamata ba ka AITC kan pynbeit ïa ka jingïakajia khappud lada ka party ka shah jied ban wan ha ka bor , une u Nongïalam ka NPP ula ong “Mano ba ong ia kata?. Oh ka Mamata Banerjee?. Haei mo ka sah?. Hato ka sah ha Meghalaya lane sah ha Assam?. “ Phi ïohi biang ba ka dei ka boss jong ka AITC bad ka hap ban kren ïa kane hynrei ngan ïathuh ha phi ba katba ki arjylla kim pat ïa mynjur lang, yn ym don mano mano ruh ba lah, la ka dei ka AITC, ka dei ka madam Mamata Banerjee, u Myntri Rangbah Duh ka Ri ne mano mano ruh. Ngi donkam ban don ka jingïasngewthuh jingmut kaba ïajan hapdeng ki ar sorkar kata ka Meghalaya bad Assam”.
U Bah Prestone ula sngewthamula ruh ïa ka jingkynnoh kane ka Nongïalam ka AITC ba ka Sorkar MDA kam shym la leh eiei na ka bynta ki lanot kiba iap ha ka jingshah ther kuli ha ki Pulit Assam ha Mukroh, kaba jia ha ka 22 tarik u Naiwieng. Ula ong ba u Myntri Rangbah ka Jylla bad ka Kynhun Myntri baroh kawei kila leit ïuhkjat sha kane ka shnong bad ka la ai ïa ki jingiarap kat kaba donkam sha ki longïing jong kine ki lanot ba iap kynthup ruh ïa kiba mynsaw.
“Hooid, ka jingïakren ban kyntiew ïa ka song jingïarap ka don. Nga tharai ka Sorkar ka dang bishar bha ïa kane namar ym tang T. 5 lak hynrei ka lah ban long palat hynrei ngam lah ban ong eiei ïa mynta namar ka Tnad ba dei khmih ka dang khmih halor kane ka dang bishar bniah ïa kane ka kam” ong u Bah Prestone.Ula pynpaw ba ym lah satia ban ai kano kano ka jingkular halor ka jingdawa ban ai kam sorkar namar la dep bthah ïa ka Tnad Political ba kan shong bishar ïa kane ka bynta.