Shillong, K’Lyngkot 27: Kumba long lem kiwei ki jylla jong ka ri India, ka jylla Meghalaya kala ïa snohkti lang ban rakhe ïa ka Republic Day kaba 77 da ka jingkmen bad jingieid ri ha Madan Polo ka sngi Nyngkong, ha kaba u Lat ka jylla u C H Vijayashankar ula pynher ia ka lama jong ka ri.
Nalor ka jingpynher ïa ka lama lai rong jong ka ri u Lat u la shim ruh ïa ka Salute ïa ki kynhun kiba la ïa shimbynta ha ka Parade kiba kynthup ïa ki pulit jong ka Sorkar Jylla bad Sorkar Pdeng, ki dkhot jong ka NCC bad ki khynnah skul bad u Symbud Myntri Rangbah ka jylla u Bah Sniawbhalang Dhar u la ia don lang ha kane ka sngi ba rakhe ïa ka Republic Day.
Haba ai jingkren u Lat ula pynpaw ba kala don ka shongsuk shongsain ha kine ki snem kiba la dep da ka jingshimkhia ïa ki sienjam ha kaba ïadei hapdeng ka jylla Assam bad Meghalaya bad ka jingpynkhlain ïa ka jingïatreilang bad ki BSF ha ki thain khappud bad ka ri Bangladesh.
Ula pynpaw ba ka sorkar kala wanrah ïa ka jingkylla da kaba kdew ba kala don ka jingshakri kaba sted lyngba ka Meghalaya Right to Public Services Act, ka jingpyniar ïa ki jingai jingshakri ha ki nongshong shnong bad ki rynsan Digital kum ka Meghalaya One bad CM Connect, kaba la shim khia ïa ka jingpynpaw ka jingeh jong ki 43,000 ngut ki paodbah.
” Ka Meghalaya kala kylla long kum kawei na ki jylla ha ka ri India kaba la kiew sted bha, kaba la ioh ïa ka rekod ïa ka jingkiew ka GSDP kaba 9.66% ha u snem 2025 bad kaba la pynneh 3 snem lynter ïa ka jingkiew kaba 10% hadien jong ka jongsaphriang ka khlam COVID-19. Ula ong ba ka jylla ka ïeng skhem ha ka lynti ban kyntiew lai shah ïa ka ioh ka kot hapoh u snem 2032, kaban ïaid ryngkat bad ka Viksit Bharat” ong u Lat.
U Lat ula aiti ïa ka khusnam Tirot Sing Award ha ka Arts and Literature ha u Dr Kynpham Sing Nongkynrih, ka Pa Togan N Sangma Award ha ka Social Service ha u Father Benoy Joseph bad ka Kiang Nangbah Award ha ka Sports and Games ha ka kong Riiohlang Dhar.
Ha kane ka jingrakhe la pyninam ruh ïa ki tabut kiba la pynkhreh da ki tnad sorkar, ha kaba ka Directorate of Mineral Resources kala jop ïa ka kyrdan kaba nyngkong, bud pat da ka Tnad Tourism Department bad ka District Rural Development Agency (DRDA).
Ha ka march-past, ka Phudmuri Presbyterian Higher Secondary School kala ioh ïa ka kyrdan kaba nyngkong, katba ka BDW International School kala wan baar bad ka Assam Rifles Public School kala wan balai.
