Ka Meghalaya ka dei ka Cancer Capital, ong Nodal Officer ka National Tobacco Control Programme

Mawkyrwat, Jymmang, 31: Ka ophis jong ka District Legal Services Authority (DLSA), South West Khasi Hills District, Mawkyrwat ha ryngkat ka jingïatreilang bad ka ophis jong u District Medical & Health Officer (DM&HO), South West Khasi Hills District, Mawkyrwat mynta ka sngi ka la ïoh ban rakhe ïa ka ‘World No Tobacco Day’ ha Balang Mawlangwir Higher Secondary, Mawlangwir, South West Khasi Hills District halor ka phang, “Ngi donkam ïa ka jingbam, ym ïa u duma”.
Lah ruh ban kdew hangne ba ha ryngkat bad ka jylla hi baroh kawei ki skul kiba don hapoh jong ka South West Khasi Hills District ki la pynlong ruh ïa ki jingïa-ïaid paidbah ban pyrshah ïa ka jingpyndon-kam ïa u duma ryngkat bad ka signature campaigns kum ka dak jong ka jingïasnohkti lang ha ka jingrakhe ïa ka, ‘World No Tobacco Day 2023’ (WNTD ‘23) Campaign kaba la sdang ha ka 22 tarik u Ïaïong, 2023 ha ka jylla.
La pynlong ïa ki WNTD Rallies bad Signature Campaigns da ka jingthmu ban pynshai bad pynsngewthuh paidbah halor ka jingsniew jong ka jingdih/jingbam duma kaba ktah ruh ïa koit ka khiah ha ka imlang sahlang baroh kawei bad kumno ban wanrah ïa ki jingkylla ha ka ban kham pynduna ïa kane ka jingkyrni jong ka jingpyndonkam ïa u Duma. Kane ka campaign ka long shibynta jong ka Tobacco Free Educational Institutions (TFEI) program ba la pynlong ha baroh kawei ka jylla ryngkat ka jingïatreilang bad ka Sambandh Health Foundation. Lah ruh ban pynkynmaw ba ha ka campaign kaba ïa dei bad kane ka juh ka phang ha u snem ba la leit kumba 481 ki skul ki la pynlong ïa ki rallies, bad la ïoh kumba 1,14,417 ki jingsoi signatures bad ba la ïashimbynta da kumba 24,005 ngut ki khynnah skul ha baroh kawei ka South West Khasi Hills District.
Haba ai jingkren ha ka jingïalang ba la pynlong ha Balang Mawlangwir Higher Secondary, Mawlangwir, South West Khasi Hills District halor ka phang, “Ngi donkam ïa ka jingbam, ym ïa u duma” ka kong D. Sohtun, Chief Judicial Magistrate -cum-Secretary, DLSA, South West Khasi Hills District ka la batai bniah shaphang ki aiñ kiba ïa dei bad ka jingpyndonkam bad ka jingdie ïa u duma khnang ban lah ban tehlakam ïa ka jingkyrni jong ka jingdih bad jingbam duma ha ka jylla.
Ha ka jingialang, u Dr. P. Phyllei, Nodal Officer, National Tobacco Control Programme (NTCP) u la batai bniah halor ka jingsniew kiba mih na ka jingkyrni ha kaba pyndonkam ïa u duma. “U Duma ym tang ba u ktah ïa kiba pyndonkam hynrei u ktah ïa u bym pyndonkam bad ruh ïa ki sawdong sawkun. U Duma u dei uta u mar uba la pyndonkam da kumba 56% ki shynrang bad la jan 25% ki kynthei ha kane ka jylla. “Ïa ka jylla jong ngi la tip kum ka Cancer Capital jong ka Ri India, namar ka jingjur jong ka jingpyndonkam ïa u Duma”, ong u Dr. Phyllei.
Ha kajuh ka por u la batai ruh ba u Duma ym tang ba u ktah ïa ki tor, hynrei u ktah ïa baroh ki dkhot met kiba don ha ka met u briew bad u dei ka daw bah jong ka jingïap kiba bun ki briew ha ka pyrthei bad u la pynïap ïa kumba 7 million ki briew ha ka pyrthei man la u snem bad 13.5 lakh ha India. U la ong ruh ba 90% kiba ïoh jingpang bampong ki dei ki briew kiba pyndonkam ïa u duma.
U la kyntu namarkata, ba lyngba kane ka prokram kum ki khynnah skul hadien ba ki la ïoh jingpynshai bad jingbatai halor ka bynta jong u duma ki dei ruh ban pynphriang ha kiwei de ïa kane ka khubor khnang ba ki briew kin kiar na kaba pyndonkam ïa u duma khnang ba kin long kiba kmen bad kiba koit ba khiah.
Kiwei de kiba ïadonlang ha kane ka sngi ki long ka kong Y. Mawlong, ADC, South West Khasi Hills District, ka Dr. B. Ramsiej, ka Dr. J. Lyngdoh Marshilllong, ki khynnah skul bad ki nonghikai jong ki ar tylli ki skul kata na ka skul Balang Mawlangwir Higher Secondary School, Mawlangwir bad na ka Balang Mawlangwir Girls Secondary School, Mawlangwir.
Ïa ka jingïalang la pynïaid da u Dr. F.R. Lartang, DM&HO, South West Khasi Hills District, ka jingkren pdiang na u bah K. Marweiñ, Principal jong ka Balang Mawlangwir Higher Secondary School, Mawlangwir bad ka jingkren khublei na u bah W. Sangriang, Principal jong ka Balang Mawlangwir Girls Secondary School, Mawlangwir.