Ka Meghalaya bad Assam ki la dep ïamir jingmut halor ka jingpynbeit pud : MHA ha Parliament

Shillong, Lber 23 : Ka Meghalaya bad Assam ki la dep ïakren ïa pynbeit la bun bun sien shwa ba kin poi sha ka jingmynjur ban ïa pynbeit ïa u pud u sam kaba dei ka kam ba la ïai sahteng da ki phew phew snem mynta, jubab u Myntri khynnah ka tnad kam pohïing ka ri ne Union Ministry of Home Affairs (MHA) u Nityanand Rai hapoh Parliament mynta ka sngi 23 tarik.
“ Namar ka jingseisoh jongka jingïakren bad ïamir jingmut jong ki myntri rangbah ka Assam bad Meghalaya ki la ïa rai ban ïa pynbeit noh ïa u pud u sam jongki da kaba sdang shwa na ki hynriew tylli ki jaka ba ïa kajia baroh shi katta” ïathuh u Rai ha ka jubab ba ula wanrah hapoh Rajya Sabha.
U la ïathuh ba ka sorkar pdeng ka ju kwah beit ba ki jylla kin ïa sngewthuh jingmut para maki halor u pud u sam bad ma ka ( sorkar pdeng) kan long tang kum ka ksiang ha kane ka kam ïa pynbeit pud.
“ Ka rukom treikam jongka sorkar pdeng ka long ba ïa kane ka kam ïa pynbeit pud dei ban ïakren sngewthuh hi da ki jylla bad ka sorkar pdeng kan shu long tang kum ka ksiang ban peit bad bishar ïa kane ka jingïamynjur jongki da ka jingïasngewthuh jingmut lang” ong u Rai.
Halor kane ka kam ïa pynbeit pud u Myntri Rangbah ka Meghalaya u Conrad K Sangma bad u Myntri ka Assam u Himanta Biswa Sarma kin leit ïa kynduh ïa u Myntri Kam pohïing ka ri u Amit Shah ha ka 27 tarik mynta u bnai ban ïa soi ïa ka MoU.
Ha u Kyllalyngkot kine ki arngut ki myntri rangbah ki la dep ïa kynduh shwa ïa u Shah bad ai ïa ki rai ba ki la shim sha u bad na ka liang jongu hadien ba u la ïoh ban pule bad bishar bniah ïa kitei ki kaiphod u kwah ban ïakynduh biang ïa kine ki arngut ki myntri rangbah.