Ka MEG kam don jingïadei bad ka jingaiti ïa ki jaka pule sha ki riewshimet : Rakkam

Shillong, Naitung 21 : U Myntri ba dei peit ïa ka tnad Pule Puthi ka sorkar jylla u Rakkam A Sangma u la kyntait ïa ki jingkynnoh ba ka (proposed) Meghalaya Education Grant (MEG) ka thmu ban aiti noh sha ki riew shimet ïa ki skul bad kolej. Halor kane u la ther tyngeh ïa kawei na ki seng saiñpyrthei da kaba ong ba kane ka jingleh ka pynkulmar hi ïa ki dalade ïalade halor kane ka ishu.
“Nga kwah ba ki dei ban wan markhmat ban ïatai bad nga lane bad ki ophisar ka tnad ba kin tip kham bniah halor kane (proposed MEG). Balei ba kin pynkulmar dalade ïalade? Dang hynin ka sngi, kijuh ki briew ki ong ba ka sorkar ka khlem leh ei ei ban kyntiew ïa ki jaka pule bad weng ïa ki jingeh baroh. Da kaba tip ïa kine ki jingeh baroh, ka sorkar jylla ka la shim ïa ka sienjam bad ki polisi treikam. Hynrei ha ka sngi kaba bud pat kijuh ki briew ki kynnoh pat ba ka sorkar ka thmu ban ai noh sha ki riewshimet ban pynïaid,” la kynthoh shuh shuh u Myntri.
U Rakkam u la ïathuh ruh ba kane ka sienjam ba ka sorkar ka shim ka long ban pynbeit ïa ka rukom hikai da kaba pynduna ïa ka jingbun kyrdan jong ki skul bad ki nonghikai na ka 14 sha ka lai tylli kata na ki skul sorkar, grant-in-aid, bad ki skul shimet.
Katkum ka jingong jong u, kane ka jingtyrwa ka don ïa ka thong ban pynïaid noh ïa ki jaka pule deficit kiba ka sorkar ka la siew hi ïa ka tulop jong ki nonghikai kiba la thung da ka sorkar.
U la ai nuksa ruh da kaba kdew ba ki college ba paw kum ka St Edmunds bad St Anthony’s, kiba ïoh ïa ka jingkyrshan pisa kaba bun bha na ka sorkar haba ïadei bad ka tulop.
Kumta, u ong ba ka sorkar ka kwah ban shimti bad pynïaid ïa kine ki jaka pule ha ka jaka ban aiti ha ki riew shimet ban pynïaid.
“Namarkata, ka sorkar ka dang sdang ïa ka jingtreikam. Ngi dang don mynta ha ka jingïakren. Ngi dang pynlong ïa ka jingïakren bad baroh ki jaka pule deficit namar ïa ka kam (post) la mang da ka sorkar bad ka tulop sha ki nonghikai ruh la siew da ka sorkar,” ong u Myntri da kaba bynrap “Namarkata, ka sorkar ka tyrwa sha ki, la kin shah neem ban pynïaid ïa ki jaka pule jong ki, lada ki mynjur ka sorkar kan shimti. Kaba mut ba ha ka jaka ban aiti sha ki riewshimet ka sorkar kan pynïaid hi ïa ki,” u la bynrap biang.
U Myntri u la pyntip ruh ba la thaw ïa ka komiti ban ïakynduh ïa baroh kiba don bynta ha kane ka kam ryngkat ki managing committee ban ïakren ïa kane ka jingthmu.
Hynrei u la pynpaw ba ki jaka pule kiba paw kum ka St Edmunds bad ka St Anthony’s college ki lah ban nym mynjur ïa kane. Katkum ka jingong jong u, ka sorkar ka ju ai ka jingkyrshan pisa kaba kot sha ka 23 klur tyngka man la u snem sha baroh ar tylli ki kolej na ka bynta ban siew tulop ïa ki nonghikai kata sha ki 70-80 ngut ha St Edmunds bad kumba 100 ngut tam pat ha St Anthony’s College.
Halor ka jingkylli, na ka liang u Myntri u la pynskhem ba ïa ka rai la ai kylluid ha ki jaka pule ban ai ïa ka rai kaba khatduh.