Ka MDA ka la phiel ïa ka jylla donkam rah jingkylla lyngba ka AITC: Mamata

Shillong, Nohprah 13: Ka khliehduh jong ka All India Trinamool Congress (AITC) kaba dei ruh ka myntri Rangbah ka jylla West Bengal (WB) ka Mamata Banerjee haba kren sha ki nongtrei jong ka party ha ka jingïalang kaba la long ha U Soso Tham Auditorium, Shillong ka la ther tyngeh ïa ka sorkar jylla halor ka jingbym lah jong ki ban synshar kat kum ka jingangnud u paidbah bad ong ba ki jingkular shuwa ka elekshon ka NPP-BJP bad ka MDA hi kam lah ban pynurlong.
Ka la ong ba lada peit halor ka pule puthi ha ka jylla Meghalaya ka don tang kawei ka jaka pule Doktor katba ha West Bengal ki don haduh 33 tylli kiba ka la seng kum ka Myntri Rangbah, ka la ong ruh ba lada peit sha ka pule puthi ha West Bengal ki samla pule ki ïoh jingpule ei haduh ki kolej khlem jingsiew namar la kyrshan skul ei da ka sorkar bad ka ong ba u paidbah un ailad noh ïa ka AITC ba kan synshar ïa ka jylla khnang ba ki jingkylla kiba bha kin urlong kumba ki paidbah ki sakhi ha WB.
Ka la ong ruh ba lada ka party kan wan ha ka bor ka pynbeit noh syndon ïa ka jingïakajia pud kaba la sah slem la da ki bun bun snem hapdeng ka jylla Meghalaya bad Assam.
“Lada ngi wan ha ka bor ka kam pynbeit pud kaba ngin buh ha khmat ban pynbeit noh hynrei lada kane ka sorkar kan dang wan biang ha ka bor kan ym pynbeit da leilei,” ka la ong.
Haba kren halor ka jingshah kynthoh ka AITC kum ka party Bengali ka Mamata ka la ong ba kane ka dei tang ka jingpyrshang ban ïalam bakla ïa u paidbah.
“Lada ïa ka jingrwai Jana Gana Mana ka jingrwai ka ri la shna da u Bengali, ka kyntien Jai Hind la pynmih nyngkong da u Bengali bad baroh kawei ka ri India ki kam trai lang ïa kane ba ka dei ka jong lang baroh balei ïa ka AITC kaba mih na West Bengal yn kynoh ba ka dei ka party Bengali,” ka la ong.
Shuh shuh ka la ong ba ki paidah ki dei ban ailad noh ïa ka AITC namar Delhi ka la jngai than katba ka Kolkata ka don tang ha jan na Shillong.
Ka la ong ruh ba ka BJP ka la leh klet ïa ka jylla bad ïa ki trai muluk bad la shu synshar beit na Delhi bad Guwahati.
“Balei ka BJP ka synshar beit na Guwahati bad Delhi balei kam ailad ïa ki trai muluk kin synshar hi bad ngi na ka AITC ngin pynthikna ba lada wan ha ka bor ïa ka jylla yn synshar ïa ka Meghalaya da u nong Meghalaya, na bynta u nong Meghalaya,” ka la bynrap.
“Ngin tang shu wan sha ka bor ngin thung ka komiti ki riew shemphang bad pule bniah halor ka ILP bad lada phi peit ba kat kane ka kam kaba khia ruh ka BJP pat ka shim sting,” ka la jubab ïa ka jingkylli ki nongthoh khubor halor ka ILP.
U Abhishek Banerjee u la ong ba ka jingbym ïoh jaka shuh ka ktien Khasi bad Garo ha ka khyrnit ba phra ka riti synshar ka ri ka dei namar na Delhi la shuh khyrwait shabi beit da ka BJP ïa u Conrad katba ki mon.
“Wat tang ban ïoh jingithuh ka ktien Khasi u Conrad u hap rah dorkhas katno sien shuh sha Delhi bad kata ka Double Engine jong ka BJP ruh kam seisoh namar ym don ba kheiñ snep ïa u namar ki khyrwait shabi katba ki mon,” u la ong.
Shuh shuh ha kae ka sngi u President ka AITC Meghalya u Bah Charles Pyngrope u la ong ba ka AITC kan don ha ka liang u paidbah bad ynda ka synshar ruh kan buh hakmat tam ïa u paidbah bad ka bit ka biang jong u.
U Dr Mukul Sangma u la ong ba kum ka party kan ym shong kli kti tad haduh ban da lah ban wanrah ïa ka jingsngewshngaiñ ïa u paidbah khamtam kiba shong ha ki khappud ka jylla.