Nongpoh, Risaw, 01: Napdeng 11 tylli ki shnong ba hap ha Nongpoh Town Committee, ka shnong Mawdiangum kala shah jied kum kawei naki shnong ba khuid tam haka thaiñ Nongpoh, bad ïa kane la pynbna da ka ophis u Deputy Commissioner haka prokram Swachhata Hi Seva 2024 haka jingïalang kaba la long ha Circuit House Nongpoh.
Katei ka Swachhata Hi Seva ka dei ka jingrakhe kaba la sdang naduh ka 17 tarik Nailur haduh 2 tarik Risaw bala pynlong da ka ophis u Deputy Commissioner haka jingïatreilang bad ka Nongtpoh Town Committee halor ka thong jong u Myntri Rangbah ka Ri, ka sorkar pdeng bad kumjuh ruh ka sorkar jylla ban wanrah ïaka khuid ka suba haki shnong ki thaw bad kiar naka jingbret pathar ïaki jaboh jabaiñ bad ban pynlong ïaki shnong ki thaw kiba lait naki jaboh jabaiñ.
Ha katei ka sngi la shim bynta ruh da u Bah Mayral Born Syiem MLA ka Nongpoh kum u kongsan haka jingdonlang u Raja Brahma ADC ka Ri-Bhoi, Bah Succesfull Lyngdoh Chairman ka Nongpoh Town Committee, ki Rangbah Shnong, ki nonghikai lem bad ki khynnah skul.
Ka ophis u Deputy Commissioner kala pynshlur ruh da ki khusnam sha ki nongkhat ñiut jong ki shnong bapher bapher ba hap ha Nongpoh Town kiba ju shimkhia ban pynkhuid ïaki shnong ki thaw naka bynta ka khuid ka suba jong ka shnong bad kumjuh ruh sha ki khynnah skul kiba la shim bynta haki jingïakop bapher bapher.
