Shillong, Naitung 21: U Symbud Myntri Rangbah ka jylla u Bah Prestone Tynsong ha ka sngi Palei u la bthah ba ka tnad Pynroi Sor kan wad ar lai tylli ki jaka na bynta ban pynkynriah ïa ki 342 tylli ki long ïing ki Harijan kiba shong ba sah ha Them Ïewmawlong.
Kane ka jingwad jaka ka sorkar ba bynta ki Harijan ka dei hadien ba ka don ka jingpyrshah kaba jur na ki dorbar shnong bad ki seng bhalang ïa ka jingthmu ka sorkar ban ai lai akar ka jaka ha jan ka RP Chest Hospital kaba don ha Mawbah.
U Bah Prestone uba dei ruh u Chairman ka High Level Committee (HLC), u la ïathuh ba ka jaka kaba ha Mawbah ka ka dei kawei na ki jaka kiba ka sorkar ka pyrkhat ba kan biang ban pynkynriah ïa ki Harijan hynrei ka sorkar kan pat shim ïa kano kano ka rai ha ka a ïadei bad ka kane.
“Namarkata, ngi la bthah ïa ka tnad Pynroi Sor ba ka wanrah ïa ka Blueprint kaban kdew shai ba ym tang kawei ka jaka hynrei ar lai tylli na bynta kane ka jingthmu” ïathuh u Bah Prestone.
U Bah Prestone u la ïathuh ruh ba u MLA ka Shillong West constituency u Bah Mohendro Rapsang, u Rangbah Shnong ba ki la wan kynduh ïa u ban pynpaw ba kin pdiang da leilei ïa kane ka rai ka sorkar.
“Nga la ong ïa ki ba kin long kiba ïai shah namar ngam lah ban ong eiei khlem pat ïoh ïa ka Blueprint ha kti jong nga bad nga sngewthuh bha ruh ïa ka jingsngew ki trai shnong bad ngi na ka sorkar ruh ngin nym thom da ka bor hynrei ngin pyrshang ban leh ïa kaba na baroh kin kmen ïa ka rai ba ngin shim” bynrap u Bah Prestone.
Ka Harijan Panchayat Committee(HPC) dang ha ki khyndiat sngi kiba la leit ki pynpaw ba kim hun satia ïa ka rai ka sorkar ban ai jaka ïa ki sha Mawbah.
U Secratary ka HPC u Gurjit Singh u la pynkynmaw ba ha 25 tarik Ïaiong ka HPC ka la mynjur ban kynriah na Them Ïewmawlong tangba ba ka sorkar ka dei ban ai jaka 200 square meters ïa man kawei pa kawei ka longïing ha European Ward bad ka bai lut bai sep ban tei ïa ka ïing ka sorkar ka dei ban tip hi nadong shadong.
“Tangba kar ka jaka ha Mawbah kam dei satia kaba hap hapoh European Ward, namarkata, ngin ïa kren shuwa para ma ngi ban shim rai namar kane ka jaka kaba ka sorkar ka mut ai kam dei kumba ngi la ia rai ha kato ka sngi” ong u Gurjit Singh had said.
Haba la kylli ïa u Bah Prestone halor kane u la jubab “La dei ka European Ward ne ka Khasi Ward ne ka Meghalaya Ward kam dei ban mih kano kano ka jingkylli ba ki” ong u Bah Prestone.
Shuh shuh u la ïathuh ba tang shu ïoh ïa ka Blueprint na ka liang jong ki kin shong pyrkhat ïa kane ka kam.
Haba ïadei pat bad ka Quater kaba ka Shillong Municipal Board (SMB) ka la shna u Bah Prestone u la ïathuh ba kane ka ïing ka dang don hapdeng ka jingmaramot bas tang shu dep maramot ka dei ka kamram ka SMB ban pynkynriah ïa ki nongtrei kiba shong ha Them Ïewmawlong.
U Bah Prestone u la ïathuh ba ka sorkar ka ïeng skhem ha ka nongrim ba dei ban pynkynriah beit ïa kine ki Harijan namar ym don shuh da kiwei ki lad.
“Ngi dang ap ïa ka blueprint bad tang shu ïoh hi ngin khot ïa ka jingïalang jong ka HPC bad ruh bad ki Harijan ban ïathuh ïa kaei kaba ka sorkar ka la pynkhreh na bynta jong ki” bynrap shuh shuh u Bah Prestone
