Shillong, Naiwieng, 15: Ka Maithili Thakur, ha ka rta kaba 25 snem kaba long ruh ka kyrtong jong ka BJP, ka la thaw histori ban jop ïa ka elekshon sha Iingdorbar Thawaiñ jong ka Bihar na Alinagar Constituency.
Ïa ka Maithili Thakur la kha ha ka 25 tarik, Naitung 2000, ha ka shnong Madhubani, Bihar, na ka longiing kaba ju ieid bha ïa ki jingrwai.
U kpa jong ka, u Ramesh Thakur, uba dei u nongrwai Classical, u la hikai pyntbit ïa ka naduh ba ka dang rit, katba ka kmie jong ka, ka Pooja Thakur, ka dei kaba ju peit ïa ka iing ka sem. Ka Maithili ryngkat bad ki arngut ki hymmen jong ka, u Ayachi bad u Rishabh, ki la thaw ïa ka kynhun rwai ba lai ngut ban kyntiew ïa ki sur jingrwai tynrai jong ka ri India.
Dang shen, watla ka Maithili Thakur, ka la shah kyntait ha ka rynsan ïakob pyni sap jong ka Sa Re Ga Ma Pa bad ha ka Indian Idol hynrei mynta ka la leh kmen da ka jingjop ha ka elekshon kaba kam shym la khmihlynti satia.
Da ka jingjop jong ka ha kane ka elekshon ka la ïoh jingïaroh na baroh ki nongïalam jong ki seng saiñpyrthei bad ha ka thain Mithila. Ka Maithili ka ju ïoh ïa ka jingïaroh ym tangba ka long ka nongrwai kaba bha ryndang, hynrei ka jingsngewrit bad ka jingieid ïa ka la jong ka thymmei. Hynrei bun ki bym tip ïa kata, shwa ba kan rung sha ka jylli jong ka saiñpyrthei, ka Maithali ka la mad ruh ïa ka jingpang ka mynsiem namar ka jingshah kyntait ha ki rynsan ïakob pyni sap.
Kum ka khynnah, ka la pyrshang borbah ban leit kiew ha ki rynsan ïakob hynrei manla ka por ka la shah kyntait. Ka la pyrshang ban leit ïakhun sa ha ka rynsan ïakob Sa Re Ga Ma Pa Lil Champs bad ha kiwei kiwei ki rynsan ïakob hynrei kam shym la lah satia ban poi sha ka thong.
Ka la ïohlad ban ïakhun ha ka audition jong ka Indian Idol Junior, hynrei kam shym la lah satia ban poi ha ka jingïakhun phainal. Wat hapdeng kine ki jingshah tynjuh kiba la jia ha ka jingim jong ka, hynrei ka iing ka sem ka la trei shitom ban kyrshan ïa ka ha ki lynti ïaid ban leit ïashim bynta ha ki rynsan ïakob rwai. Hapdeng kine ki jingshah tynjuh, ka Maithali ka la ïohlad ïa ka kabu ksiar ban rung sha ka jingïakob Rising Star ha u snem 2017. Ki jingrwai niam kiba la mih na u ryndang ba syiang jong ka, ki la jop ïa ki dohnud jong ki nongshong shnong ha ka ri. Ka la ïohlad ban rung sha jingïakhun phainai bad ka la jop ha ka kyrdan kaba ar, da kaba duhnoh ïa ka kabu ban ïohrah ïa ka nam lahduh tang da 2 vote.
