Shillong, Naitung, 17 : Ka shnong Madanryting ka la long ka Census Town banyngkong eh ha Meghalaya ban ïoh pdiang ïa ki jingmyntoi jong ka Mahatma Gandhi National Rural Employment Guarantee Scheme (MGNREGS).
Kum ka jingpdiang sngewbha ïa kane ka skhim u MLA jong ka Nongkrem Constituency u Bah Lambor Malngiang u la plie ïa u mawnongrim ha ka jingïalang kaba la long ha ka sngi Thohdieng ha ka shnong Madanryting.
U Bah Lambor u la ïathuh ha kane ka jingïalang ba ka jingurlong jong kane ka skhim ka la wan hadien ka jingbuddien halor ka rukom pyntreikam ïa ka skhim. Kane ka skhim ka long ban kyntiew ïa ka ïoh ka kot ha ki shnong nongkyndong da kaba aikam 100 sngi ïa ki nongshong shnong.
Nalor kaba kyntiew ïa ka roi ka par ha ki shnong nongkyndong, kane ka skhim kan ïarap ruh ïa ki longing longsem ban kynshew ïa ka pisa kham bun namarba ka kam kaba ki trei kan long hajan ka iing kaba ki sah. Ka jingwan sa ki skhim ka Sorkar Pdeng kum ka Pradhan Mantri Awas Yojana bad ka Swachh Bharat Mission kan sa long shuh shuh ka jingmyntoi ïa ki longing ha ki shnong ki thaw ban ïoh ïa ka ing ka sem, ban ïoh ïa ka umbam umdih kaba khuid bad ka jingshna ïa ki paiñkhana.
Ka Deputy Commissioner jong ka East Khasi Hills ka Kong Isawanda Laloo ka la ïathuh ba 29 tylli ki Census Town hapoh ka East Khasi Hills District kin sa shah kynthup ha ka Mahatma Gandhi National Rural Employment Guarantee Act (MNREGA).
Ka la ong ba ka MNREGA ka dei ka skhim na ka bynta ka shnong ka thaw bad ka jingjop jong kane ka skhim ka shong eh ha ka jingïashim bynta pura jong ki paidbah nongshong shnong.
Ka la pyntip ba ki don kumba 260 tylli ki jait jingtrei ïa kiba lah ban pyntrei hapoh kane ka skhim.
Ka la pynpaw ïa ka jingkyrmen ba ka MNREGA kan sa pynkhlaiñ ïa ki Self Help Group ha kane ka shnong bad ban kyntiew ruh ïa ka ïoh ka kot jong ki kynthei.
Ha kane ka sngi la sakhi lang da u MDC jong ka Nongthymmai Constituency u Bah Latiplang Kharkongor, u BDO jong ka Mylliem C&RD Block u Bah P. T. Passah bad kiwei kiwei.
