Ka lynti ka la khang ïa kine ki nonghikai ba ïakhih, ka sorkar kam lah leh ei ei shuh

Shillong, Nailar 02 : U Symbud Myntri Rangbah (Dy CM) ka jylla u bah Prestone Tynsong u la ong ba u sngewsynei ïa kine kiba pli ki nonghikai kiba ïakhih hynrei yn leh shuh kumno haba ka lynti ka la khang ïa ki bad wat la ki ïakhih ruh kam myntoi namar ka sorkar kam lah ba leh ei ei shuh da lei lei ruh.
U la ong wat la kine ki ïakhih hapoh ka lama Meghalaya LP School Contractual Association (MLPSCA) hynrei ka sorkar kam lah shuh da lei lei ruh ban dang thung biang ïa ki wat la ki dawa ruh namar ladep thung lut da kiba la pass hok ïa ki interview ha baroh ki post ba lait ne thylli.
Haba ïakren bad ki nongthoh khubor u la ong “ ïa kine ki nonghikai la thung kum ki Officiate ne kontrak, ha kito ki skul kiba don ki nonghikai kiba la shongthait ne ki don kiba khlad bad haba ka sorkar ka i donkam ban don kyrkieh ki nonghikai ka thung officiate katba ym pat lah ban pyndep ïa ka interview. Kumta kat kiba aplai la thung da ka sorkar bad man la ka 59 sngi la pynthymmai ïa kata ka kontrak jongki. Ki la dei ban sngewthuh lypa ia ka jingmut kontrak namar ha kano kano ka por ki lah ban shah weng. Nalor kata ka sorkar ka la ailad ïa ki ban ïaleh ïa ka DL.Ed bad wat ïa ka MTET ruh wat la ka rta jongki ka la nang ïaid shakhmat ruh. Hadien kane la ailad ba kin ïakhun ïa ka interview ruh hynrei yn leh kumo haba kim pass ka interview kumta kito kiba pass hok la hap ban thung ha kito ki post ba lait bad baroh ki post ba lait la dep thung lut ïa kiba pass ïa ka interview”.
U la ong shuh shuh “ Nga sngew synei shisha ïa ki namar ki don hi kiba la hikai kumba ar, lai ne saw snem ruh katba ka tnad pule puthi kam pat lah ban pyndep ïaka interview hynrei haba la dep la hap ban thung lut ïa kiba pass bha. Kumta ïa kine kiba shu thung offciate ne kontrak la hap ban weng noh kat kum ki kyndon ba la buh wat ha ka shithi thungkam jongki ruh. Kumta mynta ka sorkar kam lah ban leh ei ei shuh namar la dep thung lut ha kito ki post kiba lait. ïa kine ruh la dep ailad ba kin ïakhun ia ka interview tangba imat ki khlem pass na kata ka daw ki khlem ïoh rung shuh ha ka kam nonghikai”.
Ka sorkar kam lah shuh ban dang thung ïaki namar ym don shuh ki sanction post kiba lait lah dep thung lut ha baroh ki skul LP na kito kiba la pass ïa ka written bad personnal interview.