Ka Lyngkha Bneng ka dei ka jingshem halor ka jingïadei ki nongpeitkai : Pradip Kurbah

Shillong, Nohprah 13: Ka phlim “Ha Lyngkha Bneng – The Elysian Field” ka phlim thymmai kaba la ïoh khusnam da u Bah Pradip Kurbah u nongshna ïa kane ka phlim, la pyni paidbah ha St. Anthony’s College, Shillong. La ong ba ïa kane la pynlong da ka Department of Mass Media ha ryngkat ka jingïatreilang bad ka Kurbah Films, Hello Meghalaya bad Ka Knup Creatives.
Ha kaba ïadei bad kane haba kren shaphang ka phlim, u Bah Pradip Kurbah ula pynpaw ïa ka jingshem halor ka jingïadei ki nongpeitkai bad kam ki jong u. “Man la u briew ki don ïa la ka jong ka bynta ban peit ïa ka phlim. Ki don ïa la ka jong ka jingsngew bad nga tharai kadei kaei kaei kaba khraw ïa nga kum u nongshna phlim. Kumta ka long ruh kum ka lad ïa nga ban ïoh ïa ka jingshemphang”.
U la ong, “Nga dap da ka jingkmen bad nga sngew kyndit, ha ki jaka kaba nga tharai ba ki briew kin ym rkhie, hynrei ki lah ïa rkhie bha hangne. Ka khubor ka long, haba pyllait ïa kano kano ka phlim, nga shu kwah ba kin wan ban peit ïa ka phlim. Nga tip ïa ki nongpeitkai ba kidei kiba stad, da ka jingwan jong ki rynsan OTT, nga kyrmen kin pdiang ïa kane ka phlim.”
Lah ban ong ba ka phlim kadei shaphang ka jingim jong ki 6 ngut ki briew kiba shong ha ki jaka kynjah ha thaiñ nongkyndong, ka jingthrang, ka jingïateh ka jong ki bad ka jingkynriah ïa ka jingïadei ka jong ki kaba la batai shaphang ka jingim.
Ha kane ka jingpyni ïa kane ka phlim la wan ban sakhi da u Nongaibuit ka tnad Social Welfare u Bah Paul Lyngdoh, uba la ong, “Ka pyni ïa ka jingkordor jong ka jingkhuslai jong ka imlang sahlang kaba im ha ka tnger jong ka jingkhyllem. Kaba pyni kaei kaba la jia hapoh Meghalaya.”
Katba u nongak phlim uba pawnam u Melvin Mukim, uba la ak ha ka phlim ula pynpaw ïa la jinshem ka jong u kaba ula ïadon bynta bad kane ka projek naduh u snem 2022.
“Ha Lyngkha Bneng ka long palat ban ïa ka jingïathuhkhana. Kadei ka jingpyni ïa ka jinglong tynrai bad ïa ka pyrthei ka bym pat ïohi kaba saiñdur ïa ka jingsngewthuh ïa ka jingim, kaba la suhthied ha ka rukom pyrkhat pyrdaiñ u Khasi. Ka phlim kadei kaba ïaid lang bad ka jingshisha bad ka puriskam, kaba ïahap ruh bad ka jingïaid lynti jong ka mynsiem briew ha kylleng sawdong kaba long pyrthei bad kaba long Blei. Kadei ka phlim kaba ai burom ïa ka jingriewspah ki barim bajah ryngkat bad ka pdiang ïa ka ktien ha ka pyrthei ban ïathuhkhana”.
Ki nongwan peitkai ki la ïaroh ïa kane ka phlim ïa ka jinglong bashisha ka jong ka, ka jingwad halor ka jinglong marwei, jingtieng bad jingïap bad ki khyllipmat jong ka jingbiria kaba la phalang ïa ka jingbteng jong ka jingrkhie.
Ka jingjop jong ka “Ha Lyngkha Bneng – The Elysian Field” dang shen ka la ïoh ïa ka khusnam Golden St. George ha ka Best Film, Best Director, Best Director ha ka 31st Kolkata International Film Festival (KIFF) kaba la long ha u Naiwieng 2025, bad ka NETPAC Award kum ka Best Asian Film ha ka Moscow International Film Festival 2025.
Shuh shuh la khmih lynti ba kane kan pynshlur shuh shuh ïa kiwei ki nongshna phlim kiba la ïohpdiang ïa kum kitei ki jingkyrshan na ka sorkar jylla. Bun tylli ki phlim kiba la ïoh ïa ka jingïarap bad jingkyrshan kidei kiban sa pyllait paidbah noh ha ki bnai ban dang wan.