Ka longkmie kaba stad ka tei ïaka ïing bad ka imlang ka sahlang, rakhe ka NAWWA ïa u mawmer ka jingïaid lynti ba 25 snem

Nongpoh, Risaw 20: Hapdeng shibun ki jingeh ki jingtynjuh haka jingïaid lynti, ka seng Nongpoh Area Women Welfare Association (NAWWA) kaba dei ka seng kaba ju peit ju khmih ban kyntiew ïaka eh ka shon ki para longkmie mynta ka sngi kala rakhe ïa u mawmer ba 25 snem ka jingïaid lynti naduh bala seng ïaka ha u snem 2000.
Ha kane ka sngi rakhe ïaka jingjam sha u maw mer uba 25 tylli ki snem, la wan ban ai mynsiem bad ban leh kmen lang da u MLA ka Nongpoh u Bah Mayralborn Syiem kum u kongsan haka jingdonlang u Bah Balajied Rani Ex-MDC, bah Rangkynsai Makdoh Ex-CEM, Kong Meristela Marai President ka NAWWA, Bah Silvester Mynsong Rangbah Shnong Nongpoh, Samla Lumlang Shylla, President Seng Samla Nongpoh lem bad kiwei kiwei ki riew Rangbah ka thaiñ.
Kumban shu kdew, ïaka Nongpoh Area Women Welfare Association la seng ïaka haka ha u snem 2000, bad ha ka jingïaid lynti jong kane ka kynhun mynta 25 snem ka ïoh ban leh shibun ki kam naka bynta ka imlang ka sahlang naduh ki jingai jinghikai kumno ban sengkam sengjam, ki jinghikai ban ïada iaki khyllung khynnah bad shibun kiwei kiwei bad kaba kongsan eh kane ka kynhun treimon sngewbha ka la ieng skhem halor ka nongrim ban pynkup bor ïaki longkmie, ban kyntiew ïaki heprit ba kin poi shaka thong haka jingim jong ki.
Haba kren ha kane ka sngi u Bah Mayral Born Syiem u la ong ba ka kynthei kaba khlaiñ ka kyntiew bad tei ïalade hynrei ka kynthei kaba kham khlaiñ ka tei naka bynta kiwei de, kum u nongmihkhmat ka thaiñ u la ai ka jingïaroh ïa kane ka seng ki longkmie ka thaiñ Nongpoh kiba la leh shibun ki kam ba bha ban kyntiew ïaki para longkmie khamtam ban ieng hala ki jong ki kjat.
U la ong ruh ba kum ki longkmie ka kamram kam dei ban kut tang haki saw kynroh jong ka ïing shet ja hynrei sngew sarong ba ha kane ka juk ba mynta ki longkmie ki mih shakhmat ha baroh ki liang ban kit ban bah, ban shakri ïaka imlang ka sahlang bad ka jaitbynriew, kumba la pynkup bor haki” la ong u Bah Mayral da kaba bynrap ruh ba ki longkmie nalor ka kam iing kam sem ki don ruh ka bynta kaba khraw haka imlang ka sahlang khamtam ban wanrah ïaka bha ka miat, ban rat diengkhong ïaki kam sniew kam smeh ba ki khun ki skiew kin ïaid haka lynti kaba dei.
Naka liang u MLA u la kular ruh ban ïarap ïa ka seng NAWWA ba kin tei ïaka ophis treikam jong ki naka bynta ban pyntyllun ïaki kam ki jam jong ki ban shakri naka bynta ki para longkmie ka thaiñ Nongpoh.