Ka long kaba kongsan ban pynneh ïa ki khlaw ki btap, pynpaw u Chief Conservator Forest

Shillong, Lber 22: Ha ka sngi ba la rakhe ïa ka International Forest Day 2025, ka IIM Shillong, ha ka jingïatreilang bad ka Forests & Environment Department, Meghalaya, ki la pynlong ïa ka jingthung dieng halor ka phang “Forest and Food.” Ha kane ka prokram la banjur halor ka jingdonkam kaba kyrkieh na ka bynta ban pynneh pynsah ïa ka sawdong sawkun kaba dei ban ïaid lang ruh bad ka roi ka san.
Ha ka jingkren kum u kongsan u R. S. Gill, Principal Chief Conservator of Forests & Head of Forest Force (HoFF), Meghalaya, u la pynpaw halor ka jingdonkam ban don ki khlaw ki btap kiba long ban pynïaryngkat hapdeng ka jinglong jyrngam bad kaba ïarap ruh ban pynbiang ïa ka bam.
U la ban jur ban pynneh pynsah ïa ki jingtip kiba long lyngba ka tynrai, nangta ka jingdonkam ban thung ïa ki dieng, bad ka jingdonkam ban long paralok bad ka mariang khnang ban lah ban pynneh ïa ka jinglong jyrngam bad ka jingïarap ïa ki pateng ban wan.
Na ka liang Prof. DP Goyal, Director, IIM Shillong, la pynpaw ïa ka jingai jingïaroh ïa ka tnat Forests & Environment halor kane ka jingsdang bad ka jingshim smai ban pynkhlaiñ ïa ka lawei kaba ïadei bad ka mariang.
Ha kane ka prokram la donlang da kiba shah khot sngewbha kiba kynthup ïa u D. Sathiyan, Additional Principal Chief Conservator of Forests (Social Forestry & Environment), bad ka Ms. Heisa Lato, Divisional Forest Officer, Social Forestry Division. Ka jingdon jong ki bad ki jingnoh synniang ka la nang ïarap ban ïasyllok, ka jingpynpaw bad ka jingdonkam ban ïatreilang na ka bynta ban pynneh ïa ki khlaw ki btap.