Ka long kaba donkam ban tip ïa ka ktien Khasi bad Garo ïa ki khynnah ha skul: Rymbui

Shillong, K’Lyngkot 08: U Bah Lahkmen Rymbui uba dei u Myntri sorkar ba peit ïa ka tnad pule puthi, ha ka sngi Palei u la ong ba u dap da ka jingkmen ba ka kynhun myntri sorkar kala pynlong ïa ka ktien Khasi bad Garo kaba donkam ban leh sha baroh ki khynnah skul kiba dang rit haduh ka klass 1.
U Bah Rymbui u la ong, kum ka jylla ka long kaba donkam ban tip ne nang ïa ka nongrim jong ka ktien wat la kan long tang khyndiat khynsoit.
Shuh shuh u la ong, “Ka tnad pule puthi kala kdew ban sdang naduh u snem 2026 hynrei naduh u snem ban wan kan long kaba donkam na ka bynta baroh ki skul ha kylleng ka jylla”.
U la ong ba ka tnad pule puthi ka la shna ïa ka Module ha kaba ki nonghikai na kylleng ka jylla kin ïoh ïa ki jinghikai tynrai ban hikai ïa ki khynnah skul.
Shuh shuh u la ong ba ka long shisha kaba donkam ban tip ïa ka ktien Khasi bad Garo bad kum u myntri sorkar haba don ki kam ban leit kum sha ri lum Garo kan long biej kum u myntri ban ym tip wat tang khyndiat ruh ïa ka ktien Garo.
“Haba nang ban kren ïa ka ktien ka wanrah ruh ïa ka jingïajan hapdeng ki jaitbynriew namar ba la pynlong ïa ka jylla Meghalaya kum kawei hynrei la phiah noh tang da ka ktien ban kren” ong u Bah Rymbui.
Na ka liang u Myntri Sorkar ba peit ïa ka tnad kam jngoh kiai pyrthei u Timothy D Shira u la ïaroh ïa kane ka rai jong ka ban pynlong ïa ka ktien Khasi bad Garo kaba donkam ha ki kyrdan primary.
U la ong ba kane kan long ka mat ban wanrah ïa ka jingsngew shipara bad ban pynskhem ïa ka jingïadei hapdeng ka jaitbynriew Khasi, Garo bad Jaintia.
“Shisien ba ngi lah ban ïa kren iwei ïa iwei pat kane kan pynskhem ïa ka jingïadei,” la ong u Shira.