Nongstoiñ, Naitung 12: Ka District Legal Services Authority (DLSA) West Khasi Hills District, ha ka sngi Thohdieng ka la pynlong ïa ka prokram pynsngewthuh bad ai jingtip sha ki paidbah halor ki kam aiñ bad kiwei pat jingshakri, kiba ki paidbah ki dei hok ban ïoh jingtip bad jingmyntoi. Ïa kane ka prokram la pynlong ha ka Shnong Nonglang kba hap hapoh Mawshynrut C&RD Block, West Khasi Hills District.
Ki riew shemphang napoh ka DLSA West Khasi Hills District, ka tnad Pulit bad ka Public Health Engineering (PHE) Department, ki la wan ban ai jingkren halor ki mat kiba kiba pher kiba ïadei bad ka aiñ bad kiwei pat ki mat kiba donkam, kaba kynthup ïa ka Juvenile Justice Act, The Immoral Traffic (Prevention) Act 1956/ Child Sexual Exploitation/Trafficking, POCSO Act 2012 & NDPS, Free Legal Aid and Services 15100 Helpline number, ka Prevention of Women from Domestic Violence Act 2005 bad Solid Waste Management.
Ïa kane ka prokram la pdiang kylluid mynsiem da u Sordar Shnong jong ka Nonglang bad na ka liang ki nongshong shnong, kiba la pynpaw ka jingsngew kmen halor kane ka prokram jong ka DLSA, namar ki la ïoh shibun ki jingmyntoi bad ki jingtip kiba ïadei bad ka aiñ kumjuh ruh ïa ka hok ka jong ki.
