Ka long ka jingjah burom ïa ka Sorkar MDA ban shu pynthame da ki kular kai: TUR

Shillong, Jylliew, 29: Ka Thma u Rangli (TUR) ka la ai ïa ka jingkyrshan kaba pura ïa ka jingïakhih jong ki nonghikai hapoh ka shatri Federation of All School Teachers of Meghalaya (FASToM) na ka bynta ki jingdawa kiba shong aiñ bad shong nia jong ki.
“Ka long kaba jah burom ïa ka Sorkar MDA kaba la ïalam khmat da ka NPP, UDP, BJP, HSPDP, PDF, ki san ngut kiba la phet na ka Congress bad ki MLA shimet, ba kan shu pynthamme da ki jingkular kai ban pyntreikam ïa ki jingdawa jong ki nonghikai.,” ong ka TUR ha u kyrwoh ba la phah da ka Convenor ka Kong Angela Rngad.
Ka TUR ka kyrshan bad dawa lang ryngkat bad ki nonghikai ba ka Sorkar ka dei ban ai ka tulop kaba lah ban kyrshan pura ïa ka jingim bad ka iing ka sem, kata ka mut ka living wage.
Ka long kaba kyndit ba ki jingdonkam kiba kongsan jong ki nongshong shnong kum ka koit ka khiah, ka pule puthi, ka bam ka dih bad ka kamai kajih, ka Jylla ha kine ki san phew snem kam shym lah ban pynbiang ïa ki sha ki nongshong shong bad ka long ka Jylla kaba leh sniew bad sah dien tam ha kine ki liang, ong ka TUR.
“Ka kaiphot halor ka pule puthi kaba la tip kum ka PGI 2021 kaba la pynkhreh da ka tnat NITI AYOG ka pynpaw ba ka Jylla Meghalaya ka dei ka jylla kaba don sha trai duh ha ka pule puthi. Kawei na ki daw jong ka jinghiar ka pule puthi katkum katei ka report ka long ba ka Sorkar Jylla kam shym lah ban pynbiang ïa ki jingdonkam jong ki nonghikai ha ki jaka hikai jong ki, kaba kynthup ruh ïa ka jingsiew tulop,” la bynrap ka TUR.
Haba pynpaw ïa ka jingbym pdiang ïa ka jingong jong ka Sorkar ba kam don pisa, ka TUR ka la kynthah, “ka Sorkar Jylla na ka por sha ka por ka ong ba kam don pisa ban pynkiew ïa ka tulop bad pynbiang ïa kiwei ki jingdonkam jong ki nonghikai. Kane ka jingong ka long ka bym lah ban pdiang satia namar kane kajuh ka Sorkar ka kloi ban pynsyrwa kai ïa ka pisa paidbah ban thied ïa ki kali thymmai kiba remdor, ban tei ïa ki jingtei ki bym phoida bad kiba tor, ka pynlut kai ïa ka pisa ha kaba pynthamme da ki antor bad ki byrta ki shula halor ki kam kiba ka kam ba ka lah leh.”
“Ka Sorkar Jylla ka mlien mynta ban shim ïa ki ram na ki Bank kum ka ADB ha ka kyrteng ban tei ïa ki skul bad ki kolej. Ka jingkylli ka mih mano ban kit bad siew ïa kane ka ram? Ka jingma kaba khraw ka ap ïa ka lawei ka long ba ma ngi hi ki nongshong shnong bad ki khun jong ngi kin hap ban kit bad siew ïa ka ram,” la ong shuh shuh ka TUR.
“Ka kaiphot jong u Auditor General ka pynpaw ba ka Sorkar Meghalaya ka la pynduna pynban ïa ka jingpynlut na ka bynta ka pule puthi haduh kumba T. 67 klur tyngka ha u snem 2020-2021. Ka tnat Pule Puthi ruh ka hap ban shim ïa ka jingkitkhlieh namarba kam shym la lah ban pynbiang ïa ki kot ki sla ban pynshisha halor ka jingpynlut ba ka ïoh na ki Grant ne jingkyrshan bapher bapher kaba la kot shaduh ka T. 2264 klur,” la kynthoh ka TUR.
“Kine ki dak jingkheiñ ki pynpaw ba ka Sorkar Meghalaya kam don jingkitkhlieh eiei halor ka pule puthi. Ka jingeh kam dei ka jindon ne jingbymdon Tyngka, hynrei ka jingeh kaba khraw tam ka dei namar ïa ka jingpyndonkam bakla ïa ka pisa lane ka jingbym lah ban pyndonkam ïa ka pisa,” la kynnoh ka TUR.
Ka TUR ka ieng bad dawa ba ka pule puthi ka dei ban wan hakhmat eh jong ka synshar khadar bad jingtreikam jong ka Sorkar. Ka pule puthi ka dei ka kambah ba ka Sorkar ka dei ban bah khlieh nyngkong namarba ka Jylla kaba kiew ha ka pule puthi ka dei ka Jylla kaba mait shaphrang bad ki nonghikai ki dei u klongsnam jong ka jingkiew ka pule puthi. Kumta ka TUR ka pynpaw ba ka jingïakhih jong ki nonghikai ka long kaba don burom bad ki jingdawa jong ki dei ban pynurlong mardor, la bynrap u kyrwoh.
Ha sngi Baar, ki sengbhalang bapher bapher ki la leit ai mynsiem ïa ki nonghikai skul Adhoc kiba sahmiet ha lynti ïaid kjat hakhmat Secretariat da kaba pynshna ïa ki dara bashipor, pynbiang ïa ki tusok thiah, ïa ka um bad ka bam ka dih namar ka jingsngewkhia ïa ka jingeh kaba ki la mad.