Ka long ka bym sngewtynnad kat u ma Pala un shu kynnoh lamwir ïa ka sorkar : VP UDP

Shillong, Nailur 23 : U Vice President jongka UDP u bah Allantry Franklin Dkhar u la ong ba kam long kaba sngewtynad ba kat u MP uba long ruh u President ka MPCC u ma Vincent H Pala un shu kynnoh lamwir lamtham ïaka sorkar khlem ki jingshisha.
ïa kane u bah Allantry ula thew sha ka jingkynnoh ba dang shen jong u ma Vincent ba ka tnad kam pohïing jongka jylla kaba peit da u ma Lahkmen Rymbui na ka UDP ka dei ka tnad kaba bamsap tam ha kane ka sorkar.
“ Na ka por sha ka por ngi la ju ong ba lada phi don ki jingshisha haba phi kynnoh ba kita kiba bamsap ki dei ki dkhot ka UDP, ka UDP kam map satia namar kan aiti beit ïa ki sha ki bor ka aiñ” ong u bah Allantry.
U la ong ba kane ka jingkynnoh ba khlem nongrim jong u ma Pala ka dei tang namar ba la jan ka election.
“ U la dei ban wad bniah mynno, hangno, kumno bad mano ba lum pisa na ki kali kit dewiong, shyiap, rnga, kwai tympew bad kiwei kiwei” ong u bahg Allantry.
U la ong ka long kaba suk ban shu kynnoh mata madei hynrei ban pynshitom donkam da ki kot ki sla kiba biang.
Dang shen une u heh ka MPCC u la kynnoh ba ka jur bha ka jinglum pisa na ki kali ha ki surok bah.
U ma Pala dang shen haba u leit sha Umkiang East Jaintia Hills u la lap ba ka don ka jingdawa pisa 20 hajar na kawei ka trok kit kwai bad tympew, kiba kit dewiong ki hap ban siew 1.5 lam tyngka, kiba kit shyiap 10,000 hajar tyngka, kiba kit mawshun 20,000 tyngka bad kiba kit rnga 2000 tyngka shitrok.