Nongpoh, Ïaiong 23: Haka lehñiam Pomblang jong ka Dorbar Raid ka Raid Marngar ba la pynlong mynta ka sngi ha ïewmawlong, ka khlieh blang kaba la pom pyndkut thui ka la hap beit halor sla khlem da phai khynriang shane shatai bad kane ka dei ka dak ka jingbha ïa ki khun ki hajar hapoh ka Raid.
Ka lehñiam Pomblang ka dei ka jinglehñiam ba la ju pynlong man la u snem da ka Dorbar Raid jong ka Raid Marngar ha Ïewmawlong ban kyrpad kyrpon ïa u Blei trai kynrad u nongbuh nongthaw, ban ri ban sumar sukher ïa ki khun ki hajar kumjuh ruh ki nongwan ïew wan hat khnang ban bit ban biang ka khaii ka pateng, ka rep ka riang, ban ïada ïa ka leit ka wan, ki kam ki jam jong ki khun ki hajar, ryngkat ka pule ka puthi ki khun samla hapoh ka Raid.
Ïa katei ka jinglehñiam pom blang la sakhi ruh da ka jingdonlang u Pa’iem Ainam Syiem, Syiem ka Hima Mylliem, Pa’iem Richard Syiem, Syiem ka Raid Marngar, ki longsan mansan jong ka Raid, u Basan Nongkseh, Basan Nongumlong na ka Hima Mylliem kiba peit bad khmih ruh ïa ka Raid Marngar ryngkat ki nongwan ïew kiba wan ban sakhi ha katei ka sngi.
Kum ban shu pynpaw ba ha katei ka lehñiam pomblang la pyndonkam ruh da uwei u Blang lieh, u Syiar ryngkuh ba saw bad ka syiar kynthei baiong kawei, bad ki kur binong bishon ki dei ban synñiang katkum ka jingdonkam ban lehñiam lehrukom, ki nongpyndep ka kñia ka khriam ki long uwei na ka kur Syiem bad uwei na ka kur Damlong bad ki jingdonkam baroh ka dei ban pynbit pynbiang na iingsad iingsunon da ka Syiemsad kum u klong u skaw, u khaw u kpu rew ba la dung ni bha bad u lota um sla kait, ka waitlam ban pom ïa ka Blang bad ot ïa ka syiar.
Kane ka jinglehñiam lehrukom pom blang ka dei ban pyndep tang haka sngi ba long ïew Mawlong hakhmat u mawñiam mawrukom ba don hakhmat ka iing Dorbar jong ka ïew bad ïa kine ki mawbynna bad ki mawñiam mawrukom ba don ha katei ka ïew u Syiem bad ka Dorbar Raid ki ju sumar sukher man la u snem bad ban pyndep ïa ka lehñiam lehrukom bad ka kñia ka khriam.
Haba phai khyndiat sha ka rukom kñia haka lehñiam pomblang hadien ba la dep kyrpad kyrpon ïa u Blei trai kynrad, u sohsla jong ka Kur Syiem nyngkong un shim ïa u syiar ryngkuh bad un ot na ryndang bad un pynjaw snam ha duwan dupat, nangta pat u sangot Raid na ka kur Damlong ruh un shim ïa ka syiar iong bad un ot kumjuh, nangta u Sohsla jong ka Kur Syiem un pom ïa ka Blang na ryndang haduh ban da dkut thui bad ynda ki la dep ban peit ïa ka daw jong ki syiar bad ka blang ka don sa ka jingshad mastieh ban lehkmen bad ainguh aidem ïa u Blei Nongbuh nongthaw bad ha katei ka jinglehñiam ki kynthei kim ju bit satia ban shim bynta, lait noh tang kiba wan peit bad sakhi ïa katei ka jinglehñiam.
U Pa’iem Richard Syiem haba kren ha kane ka sngi u la ong ba kane ka jinglehñiam shisien shisnem ka long na ka bynta ban bit ban biang ki khun ki hajar, ka rep ka riang, ki nongleit ïew leit hat, ka pule ka puthi bad ban shait ban khlaiñ ryngkat baroh ki nongleit ïew leit hat, wat la ki don kiba ïaleh pyrshah hynrei ki dak ki shin ki paw lyngba ka jingdkut ka khlieh jong u blang bad nangne shakhmat ka ïew kan nang roi bad nang kiew parum pareh.
