Guwahati, Naitung 16: U Nongïalam ka Indian National Congress u Rahul Gandhi ha ka sngi Balang, ula ther tyngeh ïa u Myntri Rangbah ka Assam u Himanta Biswa Sarma, da kaba kynnoh ba u leh kum u Syiem bad u la maham ruh ba ka lawei jongu kan ‘kut ha phatok’ namar ki kam bamsap.
“U dang mut ba u dei u Syiem (Raja) hynrei un nym neh slem ha ka bor” ong u Rahul Gandhi haba kren ha ka jingïalang jong ka Congress ha Chaygaon, ha ka jingwan ïuhkjat jongu kaba shisngi sha Assam. “Un kut noh ha phatok ym namar ba ka Congress ka kwah, hynrei namar ba ki briew jong ka Assam kin phah ïa u shata na ka bynta ka kam bamsap.”
U Rahul Gandhi bad u President ka INC u Mallikarjun Kharge ki don ha ka jingwan ïuh kjat kaba shisngi ha Assam ka ban pynlong ïa ka jingïakren bad ki nongtrei jong ka Congress ban pynkhreh ïa ka lawei jong ka Party ha kane ka Jylla.
“U Myntri Rangbah um pyrkhat ïalade ba u dei u Myntri Rangbah hynrei u pyrkhat ba udei u Syiem ka Jylla Assam na ka bynta 24 kynta ha ka shisngi, u bunkam ban sam pisa jong phi, ka jaka sha u Ambani, ne u Adani,” la kynnoh u Rahul.
Da kaba kynthoh ïa ka Sorkar Jylla ba la ïalam da ka BJP, u Rahul u la ong “Lada phi ïohsngew ïa u ha ka TV, phin sa pynpaw ïa ka jingtieng ha ka sur jong u”.
“U kren heh, u pyrta, hynrei phi ïohi ia ka khmat jong u ha ka TV, phin sa ïohi ïa ka jingtieng ha ka sur jong u, namar u tip ba ha kawei ka sngi, ki nongtrei ka Congress kin phah ïa u sha phatok. U tip ba kaei ka jingbamsap kaba u la leh, un hap ban jubab ha ki paidbah ka Assam. Hadien katto katne por, un leit sha phatok, ym don ba lah ban pyllait ïa u…U Myntri Rangbahduh ne u Narendra Modi ne u Amit Shah kin ym lah ban pyllait ïa u”.
Kane ka jingwan jong u MP ka Congress sha Assam ka long ban ai mynsiem ïa ki nongtrei ka Party shwa ka ilekshon MLA 2026 bad u Rahul Gandhi u la ïathuh ha ki dkhot ka Party ba la thaw thymmai jong ka Congress ka la pynkhreh ban wanphai biang haka bor.
“Ki paidbah ka Assam ki tip ïa ka jingshisha… Kin sa don ki ilekshon shen, bad ka Congress kan sa khur jingjop ha kita ki elekshon. Ngi la thaw ïa ka kynhun kaba thymmai hangne… Ngi la sdang ïa ka kam, bad shen ki paidbah ka Assam kin sa ïohi ïa ka resol” u la ong.
U MP ka Congress u la ong ba u Myntri Rangbah ka Assam bad ka ïing ka sem jong u kin hap bahkhlieh halor ki kam bamsap. “Ka Congress kan nym buh ïa u ha phatok, ki briew kin buh” la kynthoh u Rahul.
“Ka jingtieng ka la jur bha ha u Myntri Rangbah jong phi, u tip ba ki nongtrei Congress ki bym tieng kin buh ïa u ha phatok” ula pynskhem.
Haba jubab ïa ka jingkynthoh u Rahul Gandhi naka liang u Myntri Rangbah ka Jylla Assam u Himanta Sarma u la ong ba u MP uba dei ruh u nongïalam ka Congress u la kren kum kine ki jingkynnoh kham mynshwa ruh.
U Himanta u la ong ruh ba u nongïalam ka Congress u la “klet noh” ba ma u hi u ba la lait jamin ha ki mukotduma ba bun jait kiba la Registar ha kylleng ka Ri.
“Shim da ka jingthoh, thikna ba u Himanta Biswa Sarma un shah phah sha phatok’, kine ki dei ki kyntien kiba thikna ba la kren da u Nongïalam ka Liang Pyrshah, u Rahul Gandhi, ha ka jingïalang jong u bad ka Congress Political Affairs Committee ha Assam” ong u Himanat ha ka jingthoh ha ka X.
U la bteng daka ba ong “U la wan baroh shilynter sha Assam tang ban ong ïa kane, da kaba suk ban klet ba ma u hi u dang shu lait jamin ha ki mukotduma ba bun jait kiba la Registar ha kylleng ka ri. Ka jingkyrkhu kyrdoh jong nga ïa phi, Rahul ji. To pdiang sngewbha ïa ka jingpdiang sngewbha jong ka Assam haduh kaba kut jong ka sngi.”
U Rahul Gandhi u la kynnoh ruh ba ka Bharatiya Janata Party (BJP) ka leh thok ïa ki rukom thep vote, da kaba kdew ïa ka jingpynkylla ïa ka thup jong ki nongthep vote kum ka buit ba la pyndonkam ha Maharashtra bad ha Bihar. “Ka BJP ka la jop da kaba leh thok ha Maharashtra da kaba pyndonkam ïa ka voter list revision. Ki pyrshang kumjuh ha Bihar” la kynnoh u Rahul.
Haba buh ïa ka dur jong ka jingïakhun saiñ pyrthei ha ki kyntien kiba kham jylliew, u la ong, “Ka jingïaleh ha India mynta ka long hapdeng ar tylli ki jingmut — ka jingshun bad jingleh donbor jong ka RSS pyrshah ïa ka jingshisha bad jingbym leh donbor jong ka Congress.”
Haba kren shaphang ka jingbym ïaryngkat kaba nang kiew, u Gandhi u la kynthoh, “Ki don arngut ki Hindustan mynta – uwei na ki katto katne ki riewstad kiba pynlong ïa ki jingkhawai shongkurim kiba rem dor, bad uwei pat na ki riew paidbah kiba shah kit khia ha ka khajna.”
Hashuwa kane u Rahul Gandhi bad u President ka Congress u Mallikarjun Kharge, ki la poi ha kad liengsuiñ jong ka Guwahati, ha kaba la ai khublei ïa ki da u heh ka Congress ka Assam, u Gaurav Gogoi bad kiwei kiwei ki nongïalam ba rangbah ryngkat bad ki gamosa tynrai jong ki nong Assam.
U Rahul Gandhi u la ai khublei ruh ïa ki nongshad Bodo kiba la ïashim bynta ha kane ka kad liengsuiñ.
Ka jingwan u Rahul Gandhi bad u President ka INC ha Assam ka la sdang da ka jingïalang bad ki MP, ki MLA, ki nongkitkam jong ka PCC, bad ki nongïalam ba shapoh jong ka party ha kaba baroh arngut ki heh Congress ki la ïakynduh ruh ïa ki nongmihkhmat na ki jaidbynriew riewlum bapher bapher.
Kane ka dei ka jingleit jngoh kaba nyngkong jong ki nongïalam ka Congress sha Assam naduh ba u Gaurav Gogoi u la shimti ïa ka kam kum u president ka Jylla jong ka party.
