Ka kyrteng ki briew ba la ïap kin ym ïoh rung ha ka bylla 125 sngi ne ka VB-GRAM -G
Ïaroh ka BJP halor ka jingïoh ha ka lad kamai kajih
Shillong, K’Lyngkot 05: Ka Bharatiya Janata Party (BJP) Meghalaya Paradesh kala ai ïa ka jingïaroh ïa ka Viksit Bharat- Guarantee for Rozgar and Ajeevika Mission – Gramin (VB-GRAM -G) da kaba ïaroh ba kane ka plie lad ïa ki paidbah jong ka jylla ha ka kamai kajih.
Haba kren bad ki lad pathai khubor u Bah Wankitbok Pohshna uba dei u State General Secretary ka BJP Meghalaya Pradesh u la ong ïa kane ka scheme la dep ban pass hapoh parliament hynrei don pat ki briew kiba pynsngewthuh bakla sha ki paidbah.
“Kane ka VB-GRAM-G Act ym dei ba kala pynduh noh ïa ka bylla 100 sngi hynrei kala kyntiew na ka 100 sngi sha ka 125 sngi bad ha kane ka scheme kala nang ai bor shuh shuh ïa ki nongïalam shnong ba kin shim rai ïa kaei ba donkam ban shna” ong u Bah Pohshna.
Shuh shuh u Bah Pohshna u la ong, ha kane ka scheme ba thymmai ki dorbar shnong ki la lah ban tei ne shna ïa ki skul bad kiwei kiwei de ki jingshna ym shuh tang ïa ki lynti ki syngkien.
U Bah Pohshna u la ïathuh, ha kane ka scheme ka jingbei tyngka kan long 90 % na ka sorkar kmie bad 10 % na ka sorkar jylla bad kane ka scheme kan ai jingmyntoi shisha ïa ki paidbah nong shong shnong.
“Ka bylla 125 sngi yn ïoh kam ki paidbah bad kane kala long ka jingmyntoi ba khraw bad lada don kiba pyrshah ka long kumba ki pyrshah ïa ki paidbah nong shong shnong kiba ïoh ka jingmyntoi” u la ong.
Shuh shuh u la ong, Ha ka jingpyntrei ïa kane ka scheme yn ym lah shuh ban leh thok kumba la jia ha ka scheme bylla 100 sngi ha kaba wat ka kyrteng jong ki briew ba la ïap ruh ka dang don namar ha kane ka scheme ba 125 sngi yn peit bniah lyngba ki kor Degital Minitoring bad ha kane ka scheme tang kiba dei hok ban ïoh kin ïoh.
Halor ka jingshah pynsngewthuh bakla ki paidbah, u Bah Pohshna u la ong ba kin leit sha man la ki constituency ban leit pynsngewthuh sha ki paidbah ha kaba iadei bad kane ka scheme bylla ba 125 sngi bad ka jingmyntoi ba ki paidbah ki ïoh na ka.
Halor ka jingkiew jong ka ri India, u Bah Pohshna u la ai ka jingïaroh ïa u Myntri Rangbah duh ka ri u Narendra Modi bad kumjuh ruh ïa ka sorkar ba la lam kham da ka BJP bad ïa ki nongïalam ba ha khmat jong ka party.