Shillong, Nailar, 12: U nongïalam jong ka Liang Pyrshah ka Iingdorbar Thawaiñ ka Khasi Hills Autonomous District Council (KHADC) u Bah Titostarwell Chyne ha ka sngi Saitjaiñ u la pynpaw ïa ka jingsngewsih halor ka jingbym kren pyrshah jong ka Sorkar Jylla ïa ka kyntien ‘Village Council’ ba la pynrung ha ka jingpynbeit thymmai ïa ka Khyrnit Bahynriew jong ka riti synshar ka ri India ha ka jingïakynduh ba dang shen ïa u Myntri Rangbahduh ka ri u Narendra Modi ha New Delhi.
Ha ka jingïakren bad ki lad pathai khubor u Bah Titos u la ong, “ha ka por ba la wan ka komiti ngi la pynpaw ka jingpyrshah ïa ka jingpyndonkam ïa ka kyntien, ‘Unrepresented Tribe’. Baroh ki kynhun ki pyrshah bad nga ïohi ruh dang shen u Myntri Rangbah ka Jylla bad ka kynhun Myntri ruh ki la ïakynduh ïa u Myntri Rangbahduh ka ri India da kaba pynpaw ba ka Sorkar Jylla ruh ka pyrshah ïa kane ka kyntien ‘Unrepresented Tribe’ bad nga la ïohi ruh ba ka la don ka jingdawa ban kyntiew ïa ki Seat ha ki lai tylli ki Autonomous Distirct Council (ADC).”
“Hynrei nga don tang kawei, nga lyngnoh ba ka Sorkar Jylla kam shym la pynpaw ha ka jingïadei bad ka kyntien ‘Village Council’. Kane ka kyntien ka dei kaba ma ngi ki MDC jong ka Khasi Hills Autonomous Distirct Council (KHADC) ngim hun satia ïa kane namarba ka jingpynrung ïa ka kyntien ‘Village Council’ kan pynduh noh ïa ka jingtreikam jong ki Dorbar Shnong, kaba mut lada ngi don ïa ki Village Council, ngin hap ban ïaleh da ka elekshon bad ki riti ki dustur jong ngi ruh kin kylla lut hangta,’ u la ong.
“Na ka liang jong ka Council ha ka por ba nga dang long u Chief Executive Member (CEM) nga la wanrah ïa kawei ka aiñ ïa kaba la tip kum ka Village Development Council (VDC) Act, bad ka jingthmu haba wanrah ïa kane ka aiñ ka long kan urlong ka jingkwah jong ka Sorkar Pdeng ba ka don ka jingsynshar ha ki shnong ki thaw. Ka jingthmu jong ka Sorkar India ban wanrah ïa ka Village Council ka long ba ki kwah ban don ka jingsynshar ha ki shnong ki thaw ha kaba ki skhim baroh kiba wan na ka Sorkar kin wan lyngba ki shnong ki thaw. Ha kajuh ka por, ki (Sorkar Pdeng) kwah ba kan don ka elekshon jied Rangbah Shnong bad ïa ki Executive Member jong ki Village Council bad ki kwah ruh ba kan don ka jingmang bhah kyrpang na ka bynta ki kynthei,” la ong shuh shuh u Bah Titos.
Da kaba pynpaw ba ka riti dustur kam pat shah ïa ki kynthei ban don bynta ha ki dorbar shnong, u Bah Titos u la ong, “phi ïohi ba ki kynthei ki kwah ban don bynta ha ki komiti jong ki dorbar shnong hynrei ka riti ka dustur kam shah ba ki longkmie kin long dkhot ha ki Dorbar Shnong. Mynta kane ka dang dei tang ka jingïatai bad ngim pat lah ban ong ïa kane bad ka riti ka dustur hi ka long ba ki kynthei kim lah ban ïadon bynta ha ka dorbar shnong.”
Haba kylli, u Bah Titos u la ong, ka District Council ka la buh ïa ka kyndon ba ki kynthei ki lah ban long ki dkhot jong ki Village Development Council (VDC). Ngi kwah ba ka Sorkar Jylla ka dei ban kyntu ïa ka Sorkar Pdeng ba ha ka jaka ban buh ïa ki Village Council dei ban don da ki Village Development Council.
