Ka East Jaiñtia Hills District, kaba don shaphang mih ngi jong ka jylla Meghalaya, ka long ka district kaba la ioh district pura ha u snem 2012, ka don 2040 sq kilomitar ha ka jingeh bad 122939 ngut ki nongshongshnong shynrang bad kynthei kiba shong ba sah ha ki 206 tylli ki shnong.
Ka shnong Khliehriat kaba jngai kumba 100 km na ka nongbah Shillong ka dei ka nongbah jong ka district, ka dei ka head quatar kaba la paw bha ha ki kam khaiï pateng, ki mar poh khyndew khamtam kum u dewiong bad u mawshun bad ki dang long ki mar khaiï kiba dang ïaid ïew bha shabar ka jylla.
Ka jingdon kitei ki mar poh khyndew, ki la iarap shikatdei eh bah kyntiew ïaka ioh ka kot jong ki paidbah jong ka district.La kumba sanphew snem tam ne duna, ki nongshongshnong kila shim ïa kane ka kam bylla dewiong kum kawei na ki lad kamai jong ki. Kumjuh ruh, ha kine ki khyndiat snem kiba la leit noh u mawshun u la long uwei na ki mar khaiï ba paw bha, ka jingdon une u mar khaiï ka la khring ïa ki riew shimet bad ki nongkhaiï heh saipan nabar ka jylla ban wan seng ïa ki karkhana pynmih dewbilat hapoh ka district.
Ka district ka long kaba heh bad kaba paw bha ha ka jylla, ka kynthup ïa ki hynriew tylli ki elaka bad kawei ka Sidarship, ki kynteng jong ki elaka ki long, ka Elaka Rymbai, Elaka Sutnga, Elaka Narpuh, Elaka Lakadong, Elaka Nongkhlieh, Elaka Sumer bad ka Saipung Sidarship.Nalor kitei ki elaka, kane ka district ka kynthup lang ruh ïa ki katto katne ki shnong jong ki elka kiba don mar khap (Ka Elaka Jowai, Raliang abd Shangpung) hapoh u pud u sam jong ka.
Ka Elaka Rymbai ka long kawei na ki elaka kaba la rim bha bad ka elaka kaba heh bha hapoh kane ka ri lum Jaiñtia, ka don 33,354 ngut ki nongshong shnong bad 5728 tylli ki tyllong iïng kata katkum ka khana samari jong u snem 2011.
Ka jingiathuhkhana pateng jong ki longshwa man shwa ka iathuh ba ka elaka Rymbai kaba la ju tip mynshwa kum ka elaka Ynru Chnong, haduh u snem 2018 ka la don 23 ngut ki Doloi kiba la ju synshar ïa ka elaka, napdeng kitei ki doloi, 18 ngut ki dei kiba la jied da ki paidbah lyngba ki election doloi ba la pyniaid da ka Jaiñtia Hills Autonomous District Council bad 5 ngut pat ki dei ki Doloi kiba la shu sieh kum ki Acting Doloi.
U Batshem Lyngdoh, u khun jong ka meirad Kleris Lyngdoh bad u Who Miwel Bareh na ka shnong Rymbai, Elaka Rymbai, u dei u Doloi uba 22 jong ka elaka, u la shah jied bad ioh pdiang ïa ka sanad ha u snem 1993 ban long u Doloi ba pura, u long u Doloi uba trei shitom, ua pyrshang katlah kat ïai ban ai ïa ka synshar bad ka jingbishar kaba khuid bad ka bym don liang. U la noh syniang shikatdei eh sha ka imlang ka sahlang lyngba ki kam ba bha jong u.Nalor kata u long ruh uba smat ba sting ban leit jngoh ïa ki dorbar shnong ban iasyllok bad ki nongialam na ka bynta ban pyniaid beit ïaka synshar ka khaddar, u la shakri haduh 20 snem ia ka elaka Rymbai bad ha ka kyrta kaba dang pura bha u la khad noh ha ka 7 tarik u lber 2013.
Hadien ka jingkhlad utei u doloi, ka ophis jong ka Jaiñtia Hills Autonomous District Council, Jowai kala pynlong ïa ka jingjied Doloi thymmai (Elaection Doloi) ha ka 5 tarik u nailar 2014, ki nongtyrwa kiba la wan shakhmat ban ïa shim bynta ha kane ka jingiajied thymmai ïa u Doloi, ki long u Elios Swer (Suwer), Rymbai, u ïitbha Lyngdoh, Rymbai bad u bah Balios Swer (Suwer) Khliehriat West, u Elios Swer u khun jong ka meirad Le Swer bad u Who Hedni Dkhar, u la jop donburom bad la ai sanad ïa u ha ka 8 tarik u nailar 2014 bad u long u Doloi uba 23 jong ka elaka Rymbai.
Ka jingsdng bad ka jingpynlong ïa ka elaka Rymbai hapoh ka ri lum Jaiñtia, ka long kaba eh ban pynkut nia namar ba kim don ki jingthoh kiba tikna ban pynksan, kumjuh ruh ha ki por myn ba rim kaneka elaka kam paw kyrteng ha ka thup jong ki elaka hapoh ak Dorbar ‘Ri Khat ar Doloi, kane ka pynartatien ïa ki nongshongshnong shaphang ka jingdon jong ka Elaka.
Ha u snem ba la pynlong ïa ka jingiajied Doloi thymmai (Electuon Doloi) thymmai, ki la don ki jingiakren shane shatai, kiba la buh jingkylli shaphang ka jingsdang bad jingpynlong ïaka Elaka Rymbai.Ki la don ruh ki jingiakren bad ka elaka ka dei kaba dang shu pynkha thymmaida ka sorkar Bilat hadien ba ka la knieh bor ïa ka jingsynshar na u Syiem Rajendra Singh ha ka snem 1835, ki la don ruh ki jingaithuh kahna pateng kiba iathuh ba kane ka elaka rymbai kaba la ju tip mynshwa da ka elaka Ynru Chnong ka long kaba la rim, la sdang nyngkong ïa ka ha ki por ba synshar ki Syiem Malngiang ïa kaneka ri lum Khasi bad Jainytia, kitei ki jingaikren ym tang ba ki pynklumar jingmut ruh ïa ki nongshongshnong jong ka elaka hynrei ki la pynartatien ruh ïa ki nongshongshnong jong ka elaka ba markhap.Kumta, namar ba kim don ki jubab kiba biang, kitei ki jingiakren bad ki jingkylli ruh ki duh noh hadien ba la kut ka jingiajied Doloi thymmai, phewse ki la long pat de ka sohpdung ban pynher ïa u khnam ban lum jingtip shaphang ka jingsdang ïa kane ka elaka Rymbai ha kane ka ri lum Jaiñtia.
