Ka koit ka khiah dei ka thong bad jingangnud jong ka Sorkar ban pynïoh ïa ki nongshong shnong: SC Laloo

Mawkyrwat, Ïaïong, 20: Ka ophis jong u Sub Divisional & Health Officer, I/c Block Programme Management Unit (BPMU), Mawkyrwat ryngkat ka jingïatreilang bad kiwei pat ki department ka la pynlong mynta ka sngi ïa ka Health Mela ha Sakwang Presbyterian Higher Secondary School da ka jingthmu ban ai ki jingshakri ei bad kiba biang ha kaba ïa dei bad ka koit ka khiah bad kiwei pat de ki skhim kiba hap hapoh ka skhim sorkar bad ka jingpynrung kyrteng ïa kiba wan. Ha kane ka prokram la wan ïashimbynta da ki paid nongshong shnong, ki khynnah skul bad ki para ba marjan shnong.
Ki la don ruh bun ki stalls na ka bynta ban ïarap pynsngewthuh halor ki prokrams bapher kiba ïadei bad ka koit ka khiah kiba ka thong ka long ka jingpynshai halor ka Ayush Health bad Wellness Care”, ha ban pynbit pynbiang ha kaba ai ïa ki Ayushman Bharat Cards, ha kaba shna ïa ki Unique Health ID hapoh ka ABDM na ka bynta kito kiba wan ïashimbynta kumjuh ha kaba ai jinghikai bad jingpynsngewthuh ïa ki nongshong shnong shaphang ka jingbam kiba tei met, ka jinglehkhuid bad kiwei kiwei ki bynta kiba ïa dei bad ka roi ka par.
Haba kren kum u kongsan ha kane ka sngi u bah S.C. Laloo, MCS uba long u Additional Deputy Commissioner ka South West Khasi Hills District, Mawkyrwat u la khap ïa u ribbon kum ka dak jong ka jingplie ïa ka Health Mela kaba long kum shibynta na ka jingrakhe jong ka jingdap 75 snem jong ka jinglaitluid jong ka ri India ha kaba la pynlong da ka jingthmu ban pynsngewthuh paidbah shaphang kiba bun ki prokram kiba ïa dei bad ka koit ka khiah kiba ka thong bad ka jingthangnud jong ka sorkar ka long ban pynïoh ïa ki nongshong shnong ïa ka met kaba koit ba khiah, kiba dap ba biang bad kiba nang ban sumar bad phikir ïalade ban lah ban dang ïaid shakhmat ha ka jingim.
Namarkata, u khot u wer ïa ki paid nongshong shnong ban shim ïa kane ka kabu ka ban long ka jingmyntoi ïa ki ïing ki sem jong ki bad lyngba kine ki stall ba la buh ki briew ki lah ban rung bad ïoh jingshai na ka bynta ban nangkyntiew ïa ka jingim jong ki. U la kyntu ïa ki ban wan shakhmat bad ban ai ka jingïatreilang khlem kano kano ka jingsheptieng namar ka jingsheptieng ka long kum u mawjynthut ha ka roi ka par. U kyrmen ruh ba kane ka Health Mela kan ai shibun ki jingmyntoi ïa kiba bun ki longïing longsem bad ki ban wanrah ïa ka roi ka par ym tang ha ka dong ka thaiñ hynrei ha ka ri baroh kawei.
U bah I. Lawrynniang, MCS, Block Development Officer, Mawkyrwat C&RD Block u la kren halor ka jingdonkam ban nang ban sumar ïa lade na ka bynta ban lait na kiba bun ki jingpang, u la ong ruh ba ha kane ka ‘mela’ ki don bun ki stall na ka bynta ka jinglong jingman kaba biang ïa u paidbah kaba kynthup ïa kiba bun ki bynta kum ha ka jingnang jingstad, ka bam ka dih bad ka koit ka khiah.
U Dr. F.R. Lartang uba dei u District Medical & Health Officer bad I/c Sub Divisional & Health Officer u la pynpaw ïa ka jingdonkam ban ïatreilang ryngkat ka jingkitkhlieh na ki paid nongshong shnong na ka bynta ban wanrah ïa ka jingkoit jingkhiah kaba long shibynta ha ka roi ka par jong ka jylla.
Ka kong D.B.S. Mukhim, Assistant Commissioner Food Safety & Standards Authority jong ka India (FSSAI) ka la ai ka jingpynshai halor u (Fortified Rice) khaw uba la khleh da ki vitamins bad uba la sam lyngba kiAganwadi Centre, Mid-day Meal bad u ban sa ïoh lyngba ki dukan reshon (Fair Price Shops). Ka la ban jur halor ka jinglehkhuid naduh ha ka bam ka dih, ka riam ka beit, ki ïing ki sem namar ka jinglehkhuid ka wanrah ïa ka jingkhiah krat.
U Dr. W.L. Narry, Medical & Health Officer u la ïathuh ba kane ka dong ka thaiñ ka wan ha tduh eh ha ka jingkiew ka jingïap jong ki longkmie ba ar met bad ki khyllung ha baroh kawei ka ri namar ka jingbym shimkhia jong ki longkmie ba ar met ha ka ban leit phah peit ïa lade ha ki jaka sumar ha ka por kaba biang bad ka jingbym leit kha ha ki jaka sumar. Namarkata, u la kyntu ïa ki ban shimkhia na ka bynta ban ïoh ka jingsumar kaba kloi bad paka. U la wer ruh ha kajuh ka por ban shim ïa ki tika kiba ïa dei na ka bynta ka koit ka khiah kumjuh ruh ki Covid Vaccine ïa ki khynnah ki bym pat shym la ïoh.
Haduh kumba 456 ngut ki briew kiba la pynrung kyrteng ha kane ka prokram.
Ka kong A. Lyngkhoi, Block Programme Manager, National Health Mission ka la ai ïa ka ‘status report’ jong ka Mawkyrwat Block. U bah S. Kharjahrim, Headman jong ka shnong Sakwang u la ai ïa ki kyntien pdiang sngewbha bad u bah P. Nongbsaw, B.E.E u la ai ïa ki kyntien khublei.