Ka kilan met Yoga ka long kaba donkam bha ban kyntiew ïa ka koit ka khiah ki paidbah: Ampareen

Shillong Jylliew 21: Ka Myntri ka tnat ka Koit ka Khiah ka Kong Ampareen Lyngdoh ha ka sngi Saitjaiñ ka la shim bynta ha ka kilan met Yoga Sangam ba la pynlong da ka North Eastern Institute of Ayurveda and Homoeopathy (NEIAH), ha ka jingïatreilang bad ka Raj Bhavan, Shillong kum ka dak ban rakhe ïa ka 11th International Day ka Yoga ha kaba ïa kane ka prokram la pynlong ha Convocation Hall, NEHU.
Haba kren ha kane ka sngi na ka liang ka Kong Lyngdoh ka la banjur halor ka jingdonkam ban ai ki jinghikai shaphang ka Yoga ha baroh kawei ka jylla ha kaba kane kan ïarap ban kyntiew ruh ïa ka ri India ban ïarap ïa ki samla ba kin san ha ka jingmut jingpyrkhat bad ka kilan met Yoga ka long kaba donkam bha ban kyntiew ïa ka koit ka khiah ki paidbah.
Hadien ka jingkren jong ka, ka la don ruh ïa ka jingsam ïa ki khusnam kum ka dak ban ithuh ïa kiba shim bynta ha ki jingïakob bapher bapher.
Na ka liang u Commissioner & Secretary sha u Lat ka jylla u Dr. B.D.R. Tiwari haba kren ha kane ka prokram u la pynpaw ïa ka jinglong kongsan jong ka jingkilan met Yoga bad ki kam ba kongsan ba la shim da ka NEIAH ban kyntiew ïa kane ka jingkilan met.
Na ka liang Prof. (Dr.) Vijay Kumar, Director (i/c), NEIAH, haba kren ha kane ka sngi u la ai mynsiem ïa ki samla ba kin pyndonkam bha ïa ka jingïoh jingmyntoi na ka Yoga hakaba ïadei bad ka jingkoit jingkhiah ha ka met ka phad, ka bor pyrkhat bad kumjuh ruh kiwei kiwei ki bynta. U la pynkut da ki kyntien “Karoo Yoga! Raho Nirog!”
Ïa ka prokram la pynkut da ki kyntien ai khublei na Dr. Pradip Mohurle, Organising secretary, IDY 2025, NEIAH.
Ha ki bnai ba la leit ïa kane ka prokram la pynlong ruh da kaba sam ïa ki jingthung kumba 1500 spah tylli. Haba rakhe ïa kane ka prokram ki la don bun tylli ki jingïakob bapher bapher.
Ïa kane ka Yoga la pynlong ruh ha ki skul, ki college, ki ophis, bad ki jaka jngohkai ha ka jylleng ka jylla Meghalaya. Ïa kane ka prokram Yoga la pynlait ruh ha All India Radio bad Doordarshan Shillong, kaba long ruh kum ka dak ban pynphriang ïa kane ka khubor jong ka Yoga.