Ka Kiad ka nongshun bad nongpynïap briew ba shyrkhei, diaw mynsiem ki longkmie

Nongstoiñ, Naiwieng, 19: “Ka jingjia ïa pynïap briew kaba la mih ha ka shnong Rimynïar jong ka thaiñ Maweit West Khasi Hills ha ka step jong ka 12 tarik mynta u bnai, ka dei beit na ka daw ka Kyiad kaba long ma ka, ka nongpynklumar ka nongpynjot bad ka nongpynïap ïa ka mynsiem briew,” kane ka long ka sur kaba la mih hynne ka sngi ha ka jingïalang paidbah lane ka rally pynrem halor katei ka jingjia.
Ki nongkren khamtam ki ar ngut ki longkmie kata ka kong Mislinda Ryntong bad ka Seraphina Ryntong, ki la pynpaw shynna ba ka daw hi ka dei ba beit ka kyiad. Ki la ong ba ka long kaei kaei kaba ym sngew lah shuh ban pyrkhat ba kat ïa ka jingim ba kordor, la shim noh tang na ka daw ka jingbakla ha ka ktien ka thylliej hapdeng ka jingshongshit kyiad.
“Nga pynrem jur ïa kane ka jingjia bad ngi dawa ruh na ki bor jong ka aiñ ryngkat ka jingtip ki bor synshar shnong, ba ngi dei ban pynshitom tyngeh ïa une u briew u ba la leh ïa kane ka kam. Ngim lah ban len da lei ei ruh ba ka daw ba kongsan jong kane ka jingpynïap briew ka dei beit na ka kyiad. Namarkata, ki bor shnong ki dei ban shimkhia ïa kane, khnang ba ka suk ka saiñ bad ka koit ka khiah hapoh ka shnong bad ka thaiñ kan don, ym ba ka kyiad kan ïoh pynban ban synshar”, ong ka kong Mislinda Ryntong kaba dei ruh ka ASHA.
Ka la ong ruh, “Myntoi aiu keiñ mynsngi leit bylla, mynmiet pat la pynlut ha ki kam dih kyiad. Ka long kaba sngewsih haduh katta ba ha ka jaka ban kiew shakhmat bad jyllei ki kam ba bha, hynrei jyllei pynban da ka kyiad ha ka shnong Rimynïar bad ka thaiñ hynriew shnong, kaba ka kam jong ka kyiad ka long tang ban shu pynkhlemraiñ”.
Katba na ka liang ka kong Seraphina Ryntong ka la ong, “Ka long kaei kaei kaba ngim lah ban pyrkhat ba kat ïa ka jingim briew la shu shim noh tang na ka daw ka jingbym biang shuh ha ka ktien ka thylliej. Ngi te ki longkmie ngi kwah ïa ka im suk im saiñ ka bha ka miat. Ngim kwah ba ka dong ka thaiñ kaba nalor la ban ka jingduk jingkyrduh, hynrei ka jingjyllei jong ka kyiad pat ka la long kaba shyrkhei, kat haduh ba ka la nang ban shuh shuh ïa ki jingeh kiba bun jait”,
“Tang ha kine ki khyndiat snem kiba la dep ngi la sakhi ïa ka dong ka thaiñ kaba la bun satang ki jingsniew ba bun jait naduh ka kam pynïap briew, ïa shoh ïa dat bad kiwei pat kiba wanrah ïa ka jingbym shngaiñ shuh. Nga buh jingkylli hato phi ki Kñi, ki Kpa, ki kmie bad ki samla, hato phi hun mo ban shu peit kai ba kane ka jingsniew kan synshar ha ka thaiñ jong ngi. Da ka jingsngewkhia, nga kyntu sha baroh sngewbha to ngin kyndit bynriew noh bad ïatreilang ba rat dyngkhong ïa kine ki jingsniew baroh”, ong ka kong Seraphina Ryntong.
Kiwei kiwei pat kiba la ai jingkren ha kane ka sngi ki dei ki riew rangbah ba kynthup ïa u Bah Endrius Ryntong Secretary FKJGP Maweit circle, samla Ebrius Ryntong President KSU Nongtraw unit, Bah Jerimaïa Dkhar President HYC Maweit circle, Sordar shnong Wahlyndoh Bah Kitborlin Kharbani, Bah Dosingh Rongrin sordar Nongdohlieh, Bah Shimbor Umiong Nonghikai Rimynïar Presbyterian LP skul, nangta la donlang ruh ban sakhi da ki briew na ka liang jong ka tnad Pulit bad Excise.
Lah ban kdew hangne ba ïa kane ka jingïalang la pynlong da ka Synjuk Nongsynshar Shnong Hynriew Shnong ka thaiñ Wahlyngdoh, Maweit. Ha kane ka jingïalang kaba la pynlong ha ka shnong Wahlyngdoh, la tuid da ki spah ngut ki riew paidbah, ki longkmie longkpa, ki nonghikai bad khynnah skul kiba ka sur kaba tylli na baroh ka long ba dei ban Set Phatok shi jingim ïa u nongpynïap briew.
Kum ban shu pynkynmaw biang hangne ba ka jingmih paidbah hynne ha ka shong Wahlyngdoh, ka dei na ka daw ka jingjia pynïap briew ha ka shiteng synñia jong ka 12 tarik ha ka por 1 baje ei ei, ha kaba uwei u rangbah ba la 50 snem ka karta, u la shah pynïap ha la u jong u paralok hadien ka jingïa nia ïa tim ïa tla kaba jur ha ka ïing sah kaba don ha katei ka shnong Rimynïar.
U rangbah ba shah pynïap la tip kyrteng u Bokstar Sohshang ba 50 snem u ba dei ruh u nonghikai skul. Katba u briew u ba la shim ïa ka jingim une u rangbah u kyrteng u Piswel Langrin u ba dei ruh u trai ïing.