Ka khyndew ka dei jong ki paidbah, ka GHADC kam don hok ban aiwai sha ka Sorkar

Shillong, Naitung, 30: Ka Save B Mahal Committee ka la byrngem ban pynlong da ka jingïakhih lada ka Garo Hills Autonomous District Council ka mushlia ban aiwai sha ka Sorkar ïa ka khyndew ka shyiap na ka bynta ban wanrah ïa ki projek ka Sorkar ha ka khyndew jong ki paidbah ka B Mahal.
“Ka long kaei kaei kaba sngewsih, ba ka ‘Save B Mahal’ Committee bad ki paidbah nongshong shnong ki la ïoh jingtip kaba bniah na ki tyllong jingtip ba thikna bad ïa ki sakhi sabut ha kaba ïadei bad ka khyndew B Mahal, ha kaba ka GHADC ka la die ïa kine ki jaka sha ka Sorkar Meghalaya khlem ka jingmynjur jong ki paidbah ban tei ïa ka ophis treikam jong ka Meghalaya Tourism Development Corporation (MTDC) bad ka Meghalaya Industrial Development Corporation (MIDC). Baroh ka jaka ka don haduh 5000 hektar,” ong u Chairman jong ka ‘Save B Mahal’ Committee u Rimjen Ch. Sangma ha u kyrwoh ba la phah sha ki lad pathai khubor ha ka sngi Thohdieng.
“Dang shen, ki nongshong shnong jong ka B Mahal ki la pyrshah ïa ka jingpyrshang jong ka GHADC ban die ïa kane ka jaka sha ki nong Israel na ka bynta ban rep ban riang, ban buh ïa ka Meghalaya Battalion Camp bad kiwei kiwei ha kane ka jaka,” ong u kyrwoh.
“Namarkata, ngi pyrshash jur ïa ka jingpyrshang jong ka GHADC bad ngi pynsngew sha ki paidbah jong ka rilum Garo ba ki briew kiba ngi la pynkupbor ban pynneh pynsah, ban ïada bad ban peit ïa ka bha ka miat jong ka khyndew ka shyiap ha rilum Garo namarba ngi suba ba ïa ka khyndew jong ki kpa tymmen jong ngi ladep die. Ngi la ïoh jingtip ba katto katne ka jaka bad ki bynta jong ka B-Mahal ba ïar haduh 5 hajar hektar kiba hap hapoh ka North Garo Hills bad ka West Garo Hills la shu die da ka Executive Committee ba la ïalam da ka NPP ha ka dor T.50 klur ïa kaba la dep ïoh pdiang boina lypa na ka Sorkar Jylla, la kynnoh ka Committee.
“Kane ka jaka ka dei ka nongkynti jong ki paidbah, ka GHADC kam don bor ban aiwai sha ka Sorkar Jylla. Ka GHADC ka dei ka nongpeit bad ka nongïada ym ban ai ïa ka jaka katkum ka hukum jong ka Supreme Court. Kumno ka GHADC ka lah ban shu die duh? Balei ym shym la pyntip sha ki paidbah naduh ba sdang? Lada ki kwah ban wanrah ïa ki song pynroi, balei kim sngewkhia shwa nyngkong eh ïa ki paidbah ha kane ka jaka,” la ong shuh shuh ka Committee.