Ka Ri Khasi jong ngi ka dei kawei napdeng ka ri kaba itynnad tam namar ka don ïa ka Mei-mariang kaba itynnad, ki soh ki paid kiba thiang, ki kshaid kiba noh rymphum, ki wahduid kiba shngiam ban dih, ki syntiew ki skud kiba phuh man ka aiom, ki jangew jathang kiba bang, ki dieng ki siej, ki lum ki wah kiba pyniphuh pyniphieng bad ki marpoh khyndew ba lai phew jait ban pynjaw dud ïa kiwei ban tuid sha ri-lum jong ngi ban kamai spah bad thap pynjot wat ïa ka ri. Ïa kane ka jingitynnad la pynwan dur da u nongthaw kum ka ri kaba tuid da ka dud bad ka ngap kaba kham pher na ki ri ka pyrthei.
Ka ri khasi ka dei kawei ka ri kaba riewspah bha ha ka ktien bad ha ka kren ka khana, ha ka put ka tem, ha ka rwai ka siaw, ha ka rukom rep rukom riang, ha ka trei ka ktah, ha ka bam ka dih, kiba dei ki kolshor u mynbarim. Kawei ka thaiñ ka ïa pher na kawei pat ha ka sur kren bad ha ka rukom kynud bad kynnoh ïa ka ktien na kawei pa,t hynrei lada ngi bishar bniah bha kaba bun hi ka ïasyriem beit sha ka ktien kmie ne ktien tynrai khasi. Kane ka pyni ba ha ka jaidbynriew Hynñiewtrep jong ngi ka don ïa ki thaiñ ki bapher ki bapher ha kaba ka rukom im, ka shet ka tiew bad ha ka kolshor ka ïapher na kawei ka thaiñ sha kawei pat.
Ka jingïatan tyllai ïa ka burom ne ka khwan burom ha ryngkat ka mynsiem bishni hapdeng ki para nongïalam jong ngi la ha ki kam saiñ hima sima, ha ki kynhun sengbhalang, ha ki kynhun niam balang, ha ka dong ka thaiñ, ha ki shnong ki thaw, ha ki jait ki khong, ha ka ïing ka sem, ka dei kawei kaba ma bha ba ngin sa shah rem noh ha kaba bun ki jingïaleh thma na ka bynta ban ïoh ïa ka stieh ïada na ka bynta ka ri baieid jong ngi.
Ki nongïalam kiba stad, kiba ïohi jngai, kiba ieid hok ïa la ka ri kum u Tirot Sing Syiem, u Kiang Nongbah bad u Wickliffe Syiem, kim ju kwah ne khwan burom hynrei ki lum ki lang ïa ki paradoh parasnam ban ïa pyrkhat sani lang. Ki klet noh ïa ka burom ka ijot ïalade pynban ki wad lad wad lynti kumno ban jop ïa ka thma ban ïada ïa la ka ri baieid jong ngi. Ki shim ïa ki symboh pyrkhat jong ki para nongïalam bad ki kyrshan ïa kaba dei,kim ju wohnïa wohdong, kim ju bishni ne pihuiñ, thap pynjot, pynïap bad shet kylla para ri, hynrei ki ai mynsiem ban ieng ha ka nongrim ka hok khlem kynran dien.
Katba nang mih ki sngi ki por ka jingbishni ka nang khlaiñ bor, ka rung ha ki dohnud jong ngi ban thap pynjot ïa la ka ri. Ka len lade ka la jah noh ka don beit sa ka malade. Ka jingpyrkhat ïa ka jingmyntoi lang ka la duh noh ka don beit sa ka myntoi shimet bad ka klet noh ïa la ka ri kaba kdup ieid ïa ngi.
La dei ka por ba ngin ïatylli bad bret noh ïa ki symbai jong ka jingïabishni ban kyntiew joit sha jrong ïa la ka ri jong ngi. Ka khwan myntoi ha ka bishni ka pynjot bad ka pyntlod bor ban nang kham pynjot shuh shuh ïa ka ri baieid jong nga jong phi para ri.
Namarkata, ïa ngin bret noh ïa ka khwan burom bad sdang noh ban ïatylli para ri ban ïatreilang bad ieng tylli lang bad ban dawa lang ban ïoh ïa ki stieh ïada ïa la ka ri baieid thep mynsiem jong nga jong phi ko ki para ri.
Para ri khatduh ïawai, ka ri-khasi ka dei ka ri baieid thep mynsiem jong nga jong phi, kynmaw ba ngi dei ban ri sumar ïa la ka ri ym ban die tad dor ha ki poiwir shi sngi tang ban myntoi shimet, khlem da pyrkhat sani ïa ki longdien ki khun ki kti jong nga jong phi.
Kynmaw paradoh para snam ba ka ri jong ngi ka donkam ïa nga ïa phi ban pynïoh bad dawa noh mardor ïa u stieh ïada ka ri jong ngi lyngba ka jingïatylli bad ïasnohkti da u Khyriem, u pnar, u bhoi, u war, u maram, u Lyngngam ba ngin ïatreilang kum ki paid khasi baïar.
