Shillong, Nohprah, 12: Ka Khun Hynniewtrep National Awakening Movement ka la ong ba ka la pynkhreh ïa ka kynhun kaba khlaiñ ban ïakhun ha ka elekshon MDC sha ka Khasi Hills Autonomous District Council (KHADC) ka ban sa long ha u snem 2025.
“Ngi la pynkhreh ïa ka kynhun kaba khlaiñ, kaba don tang kawei ka saiñpyrkhat bad kawei ka thong da ka jingthmu ban pynthikna ba naduh u snem ban wan ter ter, ngin sa ïohi ïa ka District Council kaba beit ha KHADC khnang ba ngin pynneh pynsah ïa ka iktiar jong ka Khyrnit Bahynriew,” ong u Working President jong ka KHNAM u Bah Thomas Passah ha ka jingïakren bad ki lad pathai khubor ha ka sngi Palei.
“Kumba ka long mynta, ka long kaba sngewsih ban ïohi ba ka District Council la ka long ka EC ne ki MDC kim shym la lah ban pynneh ïa ka jingthmu jong ka Khyrnit Bahynriew. Na ka liang jong ngi, ngi la pynkhreh ïa ka jingthmu bajanai bha halor kane,” u la bynrap.
U Bah Passah u dei uwei napdeng ki phra ngut ki kyrtong ha thup kyrteng ba la pylalit da ka KHNAM dang shen ha kaba un ïakhun na Jaïaw Constituency.
Katkum ka jingong jong u, ka State Election Committee ka dang pynkhreh ban bishar bniah ïa ki kyrtong bad shen yn sa pyllait sa ïa ka thup kyrteng baar na ka bynta ka elekshon MDC ban sa long shen.
Da kaba pynpaw ba ka KHNAM ka peit ïa ka kynhun kaba biang tam, u Bah Passah u la ong, ‘ngi ladep kyntait haduh 2-3 ngut ki kyrtong ha ka thup ba nyngkong. Ha ka thup kyrteng kaba ar, ki kyrtong, kiba pan tiket, lada ngim ïohi ha ki ba ki long kiba biang, ka jingthmu, ka mynsiem ban ïatreilang bad ka saiñpyrkhat jong ka party bad ban pynthikna ba ngi lah ban wanrah jingkylla hapoh ka District Counci, ïa kita ki kyrtong ngin shu kyntait beit sharud.
Haba kyll, u Working President u la ong lada don ki kyrtong kiba tbit, ka party kan pynieng lut ha baroh 29 Constituency ha rilum Khasi.
“Ka thup kyrteng kaba ar shen kan sa mih bad ka shong ha ka State Election Committee namarba ki hap ban bishar shwa bin pa bin ïa ki kyrtong. Namarkata, ka lah ban kham shim por. Ngi aiti laitluid beit ha ka SEC namarba kan kham bha ba ka slem sa shi bnai ban ïa kaba phiel baroh san snem,” u la ïai ban.
Shuh shuh, u nongïalam ka KHNAM u la pyntip ba ka party shen kan sa pynmih ruh ïa ka Manifesto kaba kdew ïa ki mat ki jura ba ka la tied jingkhang jong ka District Council la bun bun snem.“Ka manifesto jong ngi kan long ryngkat bad ki thong jong ka KHNAM ka la kren bad ka la tied ïa ka jingkhang jong ka District Council. Ngi la thied ïa ka jingkhang jong ka district council naduh u snem 2014 ban kyntu ba ka dei ban pynbeit thymmai ïa ka AD rules 128, ïa kaba ngi la kdew shai mano ba donhok ban thep vote ha ki district council. Kane kan dei kawei na ki mat jong ngi,” u la ong.
“Ngi ladep ïakren, ïai ban bad dawa ïa ka KHADC ha ki por baladep ba la long ïa ka EC jong ka Congress ne NPP, ngi la ïai ban ba ka Trading by Non-Tribal Regulation 1945 dei ban pyntreikam ym ban ïada ïa ka khaii ka pateng jong ki bar jylla hynrei ban ïada ïa ka khaii ka pateng jong ki trai shnong bad ym ban pynmih khajna,” la ong u Bah Passah bad bynrap, “ngi la ïai dawa ïa ka Sorkar Jylla bad ïa ka Sorkar Pdeng bad ïai ban ruh ïa ka District Council ban khmih bniah ïa ka Presidential Order 1950, kaba dang sah pongding haduh mynta. Kane ka dei kawei na ki mat ba ngin sa rah ha ka rynsan ïalap elekshon.”
