Palat ban ïa ka Body Mass Index (BMI) ïa kaba la ju pyndonkam bha na ka bynta ban thew la u briew u sngaid palat pud ne sngaid khleiñ, ka dei ka syrtap jong ka khleiñ sawdong u klongsnam kaba don jingïadei kaba jan bha bad ka atrial fibrillation lane kata ka jingbym biang ne jingthut ha ka jingtied u klongsnam. “Ki jingthew kiba suk kum ka BMI ki lah ban pulom na ka bynta ban lap thikna ïa kata ka jingma ka jingtied u klongsnam jong u ne ka nongpang na ka jingpang klongsnam”, ong u Mark Rabbat, uba long u Assistant Professor ka Medicine and Radiology jong ka Loyaola University Medical Center ha Illinois jong ka ri , US.
“Kiba bun ki briew ïa kiba ym shym la ñiew ba ki dei kiba khia sngaid khleiñ palat da kita ki jingthew BMI, khlem artatien ha ka jingshisha ki don shi-bun bha ka jinglang khleiñ ha sawdong u klongsnam, kaba lah ban buh ha ka jingma ïa ki nongpang na ka atrial fibrillation”, la batai u Rabbat. Ka jingpule bniah ka la shem ïa kata ka jingshim jingkheiñ kaba pyni ïa ka jingdon jingïadei hapdeng ki syrtap khleiñ bad ka dak mong ha ka atrium ba shaphang kadiang, kaba wanrah jingma na ka atrial fibrillation.
Ym shym don kata ka jingpynthikna da ka jinglum jingtip ban pyni ïa ka jingdon jingïadei hapdeng ka BMI bad ka jingdon dak ha ka atrium ba sha kadiang, kaba long kawei na ki saw tylli ki kamra u klongsnam. Ka atrial fibrillation lane a-fib, ka jia haba kita ki kamra ha u klongsnam ki ïatyngkhuh bad ring sted bha bad ka jingbym biang ka por haba don jingthut. La ngeit ba ka jia na ka daw ka jingat ne tyrha bad ka jingdon dak mong (fibrosis) ha ka atrium ba sha kadiang. Ïa ka syrtap khleiñ sawdong shabar u klongsnam la khot epicardial adipose tissue (EAT).
“Ka jingpule bniah ka dei kaba nyngkong kum kane ban pyni ïa ka jingdon jingïadei hapdeng ka EAT bad jingjur kata ka left atrial fibrosis ha ki nongpang ba don ïa ka a-fib”, ong u Rabbat. Ka jingpule bniah la shim nuka na ka kynthup ba 54 ngut ki nongpang kiba don ïa kane ka jingshitom a-fib. Haba kheiñ kyllum ïa ka jingdon ka khleiñ sawdong u klongsnam (EAT volume) ka long 120 cubic centimeter. “Kita ki doh khleiñ ba don sawdong u klongsnam ki lah ban long ki sohpdung ka jingma na ka a-fib bad ka lah bna jia biang ka jingshitom”, la bynrap u Rabbat.
