Shillong, Naitung 22: Ka Shillong Sports Association ka la rai ban sdang noh ïa ka lympung phutbol 3rd Division 2024 ha ka 25 tarik mynta u Naitung, 2024, ha kaba ka jingïalehkai kaba nyngkong kan long hapdeng ka lahduh jong ka Fourth Division 2023- ka Kharang SC ka ban aireng pyrshah ïa ka Nongumlong SC, ha ka por 1 baje mynsngi, ha Polo.
Mynta ka kynti yn sakhi ïa 21 tylli ki kynhun ki ban ïakhun bad la phiah sha saw tylli ki Group ba la pynïakap mar san tylli lait noh ka Group kaba don hynriew tylli ki kynhun. Ha ka thup jong ka Group A ki kynhun ba la shah pynngat ki long: Kharang SC, Nongumlong SC, Lapalang SC, Nongmensong SC, Mawryngkneng SC bad ka Pomlakrai SC.
Ha ka Group B ki kynhun ki long: Iaityllilang SC, Umlyngka SC, Krang SC, Lumparing SC bad ka Mawpat SC.
Ha ka Group C ki kynthup ïa ka Mawkriah West SC, Umpling SC, Lawmali SC, Lumdiengjri SC bad ka Gorkha Association.
Ha ka Group D ki kynhun ki long: Lamlynti SC, Mawshbuit SC, Sanmer SC, Tynring SC bad ka Rynjah SC.
Kumban shu pynkynmaw ki don saw tylli ki kynhun kiba la kiew kyrdan na ka Fourth Division ha ka samoi ba ladep, kine ki kynthup ïa ka Kharang kaba rah ïa ka namlahduh, ka kynhun ba wan ba ar- ka Iaityllilang bad ar tylli ki kynhun kiba la khyllem noh ha ka Semi final, kata ka Lamlynti bad ka Mawkriah West. Hynrei ym shym la don ki kynhun kiba la shah pynhiar kyrdan na ka Third Division ha u snem ba ladep naba ka SSA ka la pynsangeh shipor ïa ka rai pynhiar kyrdan ha baroh ki kyrdan ïalehkai na bynta katei ka shi snem.
Ha kane ka kynti, ki kynhun ki hap ban ïakhun tyngeh na man ki Group kiba ki la shah pynngat, naba yn jied tang ar tylli ki kynhun ba hakhmat ki ban ïoh rung sha ka wat ïakhun Quarter final.
Bad kumba long ha u snem ba ladep, baroh saw tylli ki kynhun kiba ïohrung sha ka semi final kin shah kyntiew kyrdan sha ka Second Division katba ki kynhun ba wan hatraiduh na man ki Group kin shah pynhiar sha ka kyrdan Fourth Division ha ka samoi ban wan.
