Nongstoiñ, Risaw, 27: Ki 21 tylli ki shnong kiba don ha ka JAC ki lai Polling Station kata ka Misei, Langdongdai bad Mawsmai, ka la ïoh ban shong jingïalang kyrkieh ha ka sngi saitjaiñ ha Dorbar Hall Langdongdai namar ka jingbym patiaw ka KHADC ïa ka jingdawa. Ha ka jingïalang ka la rai ban ai por ïa ka KHADC ba pynkylla ïa ka rai jong ka, lym kumta yn nang jur shuh shuh ki jingïakhih.
Kum ban shuh pynkynmaw ba ka JAC kiba kynthup ïa 21 tylli shnong ki la dawa ban pynneh bad ban don beit ha Mawshynrut Constituency bad ki kyntait ban leit sha Rambrai Jyrngam Constituency kumba la pynkynriah jubor da ka KHADC lyngba ka Selection Committee.
Haba kren sha ki lad pathai khubor u Chairman ka JAC Bah Jeremiïa Dkhar, u la ai por ïa ka KHADC lyngba ka Selection Committee ban pynbna ba ki 21 tylli ki shnong ki la don bad pynphai biang sha Mawshynrut constituency, lym kumta naduh 2/11/2024 yn nang pynjur shuh shuh ïa ki jingïakhih.
U Chairman ka JAC u Bah Jeremiïa Dkhar u la pyntip ruh ba la dep kyrpad ruh ïa u Dy CM u Bah Prestone Tynsong ban tuklar lem halor kane ka jingdawa.
U la ong ruh ba ka JAC ka la dep kren shai ba kim pdiang ïa ka jingai Statement ne ka jingkren u Bah P.N Syiem, ban ïai shah shipor haduh ban da amendment ïa ka sixth schedule, ban ïoh pynbeit thymmai biang ïa ki shnong ki thaw. Pynban ki la pynrem halor kane ka jingkren kum ka jingkren u khynnah khunlung namar haba pan dohkha u ai pynban da u maw.
