Ka Karunya ka dei ka model ban kyntiew ïa ki samla pule ban wanrah jingkylla ïa ka ri: Lalduhoma

Shillong, Naitung 12: Ka Karunya Institute of Technology and Sciences (KITS) kaba la ngeit ba kan sa long kawei na ki skulbah, kaba don ha kjat ki lum ba itynnad jong ka Western Ghats, ka la pynlong ïa ka 31st Convocation Ceremony ha ka 12 tarik u Naitung, 2025, da ka jingshitrhem bad ka jingsarong halor ka jingkiew ha ka pule puthi.
Ïa kane ka jingrakhe pynkup burom la wan ban long kongsan da u Myntri Rangbah ka jylla Mizoram u Lalduhoma, bad uba la shah pynkup burom da ka kyrdan Degree of Doctor of Letters (Honoris Causa) kum ka dak ka jingithuh ïa ki kam bakhraw ha ki kam shakri paidbah bad kum u nongïalam ba ïohi jngai.
Ha ka jingkren jong u ha kane ka prokram convocation, u Lalduhoma u la ïaroh ïa ka Karunya kaba la long kum kawei ka model kaba wanrah ka jingngeit ban kyntiew ïa ka pule puthi bad ki jingïaid shaphrang ha ki kam technology, ha kaba u la kyntu ïa ki samla pule ba la pyndep ïa ka graduate ba kin shah ïa ka jingthmu jong ki ba kan ïalam ïa ki jingim jong ki bad ba kin long kum ki agent ban wanrah ki jingkylla ba bha.
Katba u Chancellor, u Dr. Paul Dhinakaran, ha ki jingkren ai mynsiem jong u, u la banjur ïa ka jingthrang ka university ban kyntiew ïa ki jingshem thymmai ha ka kam technology bad ka jingpynwandur thymmai ïa ka imlang sahlang lyngba ka pule puthi kaba dondor.
U la pynshlur ïa ki samla pule graduate ban long ki nongïalam ha ka akor ka burom bad ki nongshna ïa ka jingkylla, ka jingdonkam ka jingpynïasoh lang ha ki kam shemphang ha ki kam jong ki da ka mynsiem kaba don ka jingsngew synei na ka bynta ka pyrthei sawdong ka jingim jong ki.
U Chancellor u la pynïaid ruh ïa ka prokram sam khusnam ïa ki samla pule degree, ka jingsam ïa ki medal, bad ki jingai burom kiba kyrpang.
Napdeng kiba la ïoh ki khusnam Chancellor kaba la ithuh ïa ki jingtbit jong ki ha ki kam pule puthi bad ki jingjop kaba ki la ïoh lyngba ki jingtrei shitom ki long ka Tara Ann Lukose (B.Tech. Computer Science and Engineering), B. Beulah (B.Tech. Electronics and Communication Engineering), Gethsia P (M.Tech. Computer Science and Engineering), Bartika Maitra (B.A. Criminology), bad A. Reni (B.Sc. (Hons.) Agriculture), ha kaba ki la lah ban pyni ïa ki jingtbit jong ki ha ki kam wadbniah, ki jingshem thymmai, ki jinglong nongïalam, bad ki jinglah jong ki ban leit sha ka imlang sahlang lyngba ki prokram bapher bapher.
Kum ka dak jong ka kam leh isynei bad ka jingdon ka jingkitkhlieh ïa ka imlang sahlang, baroh ki samla pule kiba la pyndep ïa ka Graduate ki la ïalumlang ban synniang lyngba ki jingkyrshan ïa ki samla pule kiba tlot ka ïoh ka kot bad kiba duh ki lad ki lynti, kaba pynphalang ïa ka jingbanjur kaba kongsan jong ka university ha ka kam shakri ïa ki shnong ki thaw bad ka mynsiem ban pynphai biang ïa ka mynsiem shakri ha ka imlang sahlang.
Kane ka prokram ka la long ka jingphalang kaba khraw bor jong ka kam ka Karunya ban ohshrong ïa ki samla graduate da ka jinglong babha, ka mynsiem ïakob bad ki kam leh isynei, ban pynkupbor ïa ki sha ka jingnoh synniang kaba don jingmut sha ka ri bad sha ka pyrthei.