Ka kamram ki Nongsharai ka long ban wad ïa kiba la shah kyntait ha ka imlang sahlang: Rev Fr. Anselm Nonglang

Nongstoiñ, Nohprah, 11: Ki paidriewngeit jong ka Balang Katholik Jyllaniam Nongstoiñ, ha ka sngi u Blei ki la ïa shim bynta ha ka proseshon Ïukharis ba la pynlong ha Divine Savior Parish, Nonbah, New Nongstoiñ, ha kaba ki riewngeit na ki parish bapher bapher kiba na South West Khasi, Eastern West Khasi, West Khasi Hills District bad na kiwei kiwei ki District ki la wan ban ïashim bynta shitrhem lang ha katei ka sngi.
La sdang ïa kane ka sngi da ka Mass Bakhuid ïa kaba la pynlong ha phyllaw ka ïingmane bah jong ka “Shrine” jong ka Dohnud Bakhuid tam U Jisu” Nonbah Parish ba la tyrwa ïa ka jingkñia da u Rev. Fr. Anselm Nonglang ha ka jingïadonlang ryngkat kiwei kiwei ki lyngdoh sohblei, kiba kynthup ïa u Fr. Wilbert Marweiñ Parish Priest ka Nonbah Parish bad kiwei kiwei.
Haba pynphriang ïa ka ktien U Blei, u Rev Fr. Anselm Nonglang, u la ong “ka kamram jong ki nongsharai ka dei ban leit wad ïa kiba la jot ka jingim, kiba la shah kyntait ha ka imlang sahlang, kiba shitom ba pang bad kiba donkam shisha ïa ka jingïarap”.
Hadien ka Mass Bakhuid la sdang ïa ka jingïaid proseshon Ïukharis ka phyllaw Ïingmane ter ter sha ïew bad phai biang pat sha Ïingmane bad la pynkut ruh da ka jingmane Sakrament.
Ha kane ka sngi u Rev. Fr. Anselm Nonglang, u Diocesan Administrator jong ka Jylla niam Nongstoiñ kum u kongsan, u ba la ïoh ruh ban pyllait paidbah ïa ka kot kaba kyrteng ka “Umpohliew Jingïaroh ”, kaba la thoh da ka kynhun ki nongduwai Nongstoiñ Diocese Charismatic Group.