Ka kam ri masi kam dei kaba eh hynrei donkam pat ka jingtrei shitom bad minot

Jowai, Naiwieng 22 : Ka ophis jong ka Senior Dairy Officer, Jowai, ha ka sngi Thohdieng ka la rakhe ïa ka sngi kaba la tip kum ka National Milk Day, ïa kaba la pynlong ha phyllaw jong kane hi ka ophis. Ha kane ka jingrakhe ïa ka National Milk Day la don lang u bah L. S. Shangpliang Director, Dairy Development kum u kongsan, u ma Dabna Challam, u ma Marcolos Lyngdoh, Secretary, Umhali PMPCS Ltd (Progressive Dairy Farmers), ki nongri masi pynmih dud bad kiwei kiwei de.
Ha ka jingkren u bah L. S. Shangpliang, Director, Dairy Development u pynpaw ka jingsngewnguh ïa U Blei bad u pynpaw ruh ka jingsngewkmen kaba khraw ban ïohi ïa baroh kiba la wan poi ha kane ka jingrakhe ïa ka National Milk Day ban leh kmen shisien shisnem ïa ka sngi kha jong u Dr. Verghese Kurien uba la pynlong ïa kane ka kam ri Masi ha ka ri India kaba pynmih duna eh ïa ka dud sha ki ri kaba pynmih bun eh ka dud sha baroh ka pyrthei.
Shuh shuh u ong ba kane ka kam ri Masi kam dei ka kam ka ba eh bad kam dei ruh ka kam kaba suk hynrei ka donkam ka jingtrei shitom. “Kane ka dei ka kabu ïa ngi ba na ka dud ruh ngi ïoh nong, na ka eit masi ruh ngi ïoh nong, na ka snieh jong ka masi ruh ng ïoh nong, kam don kano kano kaba mih na ka masi kaba ngin duh nong. Kumta kane ka kam ri Masi ka dei kaba khraw, kaba donkam ka dei ka jingtrei shitom. Ka jingtrei shitom kam dei tang ïa ki nongri masi ban pynmih dud hynrei ha ka juh ka por ka donkam ïa ki paidbah ban ïa dih dud namar lada kim don ki nongdih dud lehnohei ia kiba nongpynmih ïa ka dud”, u la ong.
Shuh shuh u ong kumba ka long baroh shi katta hi ka jingpynmih dud ka duna bha katba ka jingdonkam ia ka dud ka ba heh Te Lada ki nongri masi kim trei shitom ban pynmih kham bun ka dud kita ki dud kiba wan na bar kin sa shim ïa kane ka iew jong ngi. Kumta dei ban ban kyndit thiah noh kane ka dei ka sien ka ba sdang ban leh ïa ka kam, ka donkam ban minot, ngi donkam ban peit shakhmat ki bun ki jingmyntoi kiba ïoh shakhmat ruh. Ki don ki skim na ka sorkar na ka bynta ki nongri masi.
Ha kane ka sngi la sam ruh ïa ki khusnam sha ki nongjop ha ka jingiakop Quiz, Extempore Speech, Poster Making Competition Upper Primary Category, bad Sport Activities Extemporeha ka jingiakop Quiz ïa ka kyrdan nyngkong la ïoh da ka Wymhasa Gympad bad ka Monica Phawa na ka Government Boys Higher Secondary School, ba ar da u Brillingso Tlang bad ka Sophia Dhar jong ka Kiang Nangbah Higher Secondary School, Jowai bad balai da ka Manjait I Suchiang bad ka Susandaroi Rabon Govt Girls Higher Secondary School, Jowai. Ha ka jingiakop Extempore Speech pat ia ka kyrdan ba nyngkong la ïoh rah da ka Agatha L Jongte na Thomas Jone Synod College, Jowai, ba ar da ka Wymhasa Gympad na Govt Boys Higher Secondary, Jowai bad ba lai da ka Lewaki Dan na Thomas Jone Synod College, Jowai.
Ha ka ban pynkut ïa kane ka jingrakhe la ïoh ka jingkren aikhublei na u ma H. Rumut, Dairy Officer sha baroh ki ba la ïoh ban wan poi sha kane ka jingrakhe ïa ka sngi National Milk Day. Kham hashwa la ïoh ïa ka jingkren pdiang na ka kong M. Shylla, Senior Dairy Officer, West Jaiñtia Hills District. La ïoh ruh ka jingrwai pdiang (Welcome Song) na ka Staffs of Jowai Dairy Plants. Ha kane ka sngi la pynkup burom ruh ïa uwei na ka Progressive Dairy Farmer ne ki nongri masi pynmih dud u Marcolos Lyngdoh, Secretary, Umhali PMPCS Ltd (Progressive Dairy Farmers).