Ka kam rep synsar ka daw jong ka jingduhnoh ki khlaw ki btap bad tyrkhong ki tyllong um ha WKHD

Tesar Marweiñ

Nongstoiñ K’lyngkot 29: Ka kam rep synsar ka dei kaba ai jingmyntoi ïa ki paitbah nong shong shnong hynrei haba phai ha kawei pat ka liang ka dei kaba ktah haduh katta katta ïa ki khlaw ki btap bad ki tyllong um.
Haba phai ha West Khasi hills ka jingsdang jong ki paitbah nong shong shnong ban rep synsar kam pat da slem bad ka jingsdang ba malu mala ka dei san snem hadien jong ka jingshah khang pom dieng ha ka Supreme Court ba don burom ha ka 12 tarik jong u bnai Nohprah jong u snem 1996 bad dei ha kitei ki snem ba ki nong shong shnong ha West Khasi hills ki la mad ïa ka jingkyrduh kaba shyrkhei bha bad tang ban thied khaw ruh kiba bun ba lang khamtam eh ha ki shnong kyndong kim ïoh shuh wat tang ïa u khaw ban bam ruh.
Ki khynnah kiba leit pule bun ki la sangeh noh namar ki hap ban durut ha ka trei lyngkha bad ha kitei ki snem ym don shuh wat kawei ka pynthor kba kaba sah shrah hynrei baroh ki la kylla long ki jaka rep kba.
Nalor kata ki khlaw ki btap ki la synlen lut na ka jing pom shyrti na ka bynta ban rep riew hadem, rep krai, bad kiwei kiwei.
Hadien katto katne snem mih pyrthei sa ka ïew synsar bad ka dor ruh ha kitei ki snem ka dang ïaid kumba khatsan haduh arphew tyngka shi kilo.Dei naduh kitei ki por ba ka jingrep synsar ka la sdang ha man la ki jaka hapoh ka district ha kaba ki paitbah nong shong shnong ki la sdang ban ïabeh ha ka kam rep synsar bad hadien ba ki la dep pom shyrti ïa ki khlaw ki thung noh da u synsar.
Nalor kata ha ki snem ba la dep wat la ïa u synsar dang kheiñ ba udei u mar khlaw ruh namar ka dor ïew ka biang ki nongrep ki ïabeh bha namar ban rep ruh ka suk ban ïoh symbai ruh ka suk.Ha kine ki snem lei lei naduh ba u bah Himalaya M.Shangpliang MLA barim ka Mawsynram u la pynsgew sha ka sorkar ba kan ithuh noh ïa u synsar kum u mar rep ki paitbah ki la nang ïabeh shuh shuh ban rep kham bun.
Katba nang mih ki snem ka kam rep synsar ha West Khasi hills ka la nang kiew bad kat haduh kine ki sngi lajan mar shiteng ki bynta jong ka West Khasi hills ki la dap tang da ki jaka rep synsar suda katba ki khlaw bad ki dieng ki siej ki la nangduna.Ki um pohliew ki la nang duh, ki mrad ki mreng, ki sim ki doh ki la nangduh jait namar kim ïoh bam shuh.
Ha kaba ïadei bad kane ka mat ym shym pat don ki riew shemphang, ne ki stad wad bniah ha kaba ïadei bad ka jingkylla jong ka mariang, ka jingduh jait ki mrad ki mreng ki sim ki doh khamtam eh ka jingnang duh jong ki umpohliew bad ka jingkylla pyrdet jong ki aïom jong ka snem.
Haba pyrshang ban peithuh bad bishar bniah kaba ïadei bad ka jingsdang duh jait jong ki mrad ki mreng, ki sim ki doh la lap ba kam dei eh tang na ka daw jong ka jingpynïap pathar jong ki briew hynrei ka daw kaba kognsan eh ka dei na ka jingpom pathar palat ïa ki khlaw ki btap na ka bynta ban shalan dieng bad thang rnga.
Ka dei ruh ka jingshisha namar ba ki mrad ki mreng bad ki sim ki doh kim sngewtynnad shuh ban shong haba ki khlaw kim don shuh namar ki jingbam ba kongsan ki dei ki sohkhlaw, ki puit ki khñiang bad kiwei kiwei.
Lada phai sha ki mrad ki ba kham heh kum ki ksei, ki sniangkhlaw, ki sier, ki sohkhlaw ki dei ki jingbam ba kongsan bad haba kim ïoh shuh ïa ki jingbam ki hap ban phet noh sha ki jaka kiba don jingba.
Nalor kata wat ki dohkha doh pnat ruh kim juh shuh ban shong ha ki wah lada ïa ki khaw kiba don ha shi lynter ki wah la pom bad pynsynlen lut namar ki jingbam ba kongsan jong ki doh kha doh pnat, ki sher, ki syngkai ki dohthli doh tham bad ki shalynai ha ki wah ki khñiiang kiba hap na ki sla dieng haba beh ka lyer, ki thabalieh khamtam kito ki thabalieh kiba her mynmiet, ki kynja skaiñ, ki soh jong kiba bun jait ki dieng kiba hap bad kiba shah rong ha ka um.
Wat la katta ka ruh namar ka jinglalot spah jong u khun bynriew yn ym don mano mano ba lah ban pynsgewthuh bad lada ka jingpom pathar ïa ki khlaw bad ka jing ïabeh ban rep synsar ka dang ïai bteng ka jingtim kaba khraw kan long ïa ki khun ki kti bad ka pateng ban wan.