Shillong, Risaw, 23: U nongïalam ka Seng Congress u Bah Vincent H. Pala u la ong ba ka jylla kan twa,lada ki paidbah ki dang shahniah ha ka United Democratic Party (UDP).
U Bah Pala u la ong ba ka UDP ka dei ka daw kaba wanrah ïa ka jingsynjor la ka long ha ka shongsuk shongsaiñ bad la ka long ha ka synshar ka khadar.
“Lait tang ha ka por ba dang im u (L) Dr Donkupar Roy. Hynrei mynta ki don tang ki jingduna suda ha ki nongïalam,” u la ong.
Haba kynthoh halor ka jingtwa u tnum pyllun ba dang tei jong ka Assembly bathymmai ka dei na ka daw ba ka jyrsieh bamsap ka la jur shaba palat, u Bah Pala u la ong, “ka UDP ka dei kaba bat ïa ka shuki Lamphang bad hangne ruh ka la phiel. Ki kwah ban plie kyrkieh noh ïa ka Assembly…..ki kwah ban shu pynbor ïa ki Engineer lane ïa ki Kontraktor ban pyndep ïa kane ka projek khnang ba kin dup ïoh nam hynrei phi dei ban tip ba u don u pud ïa kiei kiei baroh.”
Ha kaba ïadei bad ka jinglen jong u Lamphang ka Ingdorbar Thawaiñ u Bah Metbah Lyngdoh ba ka Assembly Secretariat kam don bynta eiei ha ka jingkhyllem u tnum pyllun (Dome), une u nongïalam ka Seng Congress u la ong, “ki don bynta ban khot ïa ka tender bad ban shim ruh ïa ka rai ha kaba ïadei bad ka tender bad ban pynkiew ïa ka dor, ïa kaba la leh da ka Assembly.”
“……baroh ka pisa ka wan na ka Assembly bad nangta ka leit sha ki tnat ba pyntreikam. Namarkata, um lah ban len ïa ka jingshisha ba kim don bynta eiei. Kumno kin pynkiew ïa ka dor haba ïa ka tender la khot katkum ka pisa ba la mang bad ïa ka Bill la siew ha ka dor kaba rem bad ka pisa ruh ka wan na ki. Kumno u la nud ban len ïa kata? Kata ka bym lah ban long. Ki don bynta bha bad kim lah ban teipop lane ban khynñiat ïa ka jingkitkhlieh sha kiwei pat,” u la ong.
U Bah Pala u la ïaiban halor ka jingdawa jong ka Seng Congress ban thung ïa ka Independent Inquiry halor ka jingtwa jong u tnum pyllun.
U la kynnoh shuh shuh ba ka jyrsieh bamsap ha ka tnat Kam Pohing ka dei ka bym pat ju ïohi mynno mynno ruh ha ka pakit ki mynnor jong ka jylla Meghalaya.
“Mynta ïa u drok lah ban ïoh da kaba suk……kim lah wat tang ban tehlakam ïa u drok,’ u la ong haba kynoh shuh shuh ba ka jyrsieh bamsap ka la jur bha wat ha ka tnat Social Welfare ha kaba ka kaiphod tohkit halor ka bamsap na u khaw kam pat mih pyrthei haduh mynta.
“Baroh kine ki tnat ki dei kiba la bat da ka UDP. Nga don ka jingngeit kaba skhem ba ki paidbah ka jylla Meghalaya ba kim kiba biej haduh katta katta ba kim ïohi ïa kane,” u la ong.
Ha kajuh ka por, u Bah Pala u la ongba ka UDP ka khur lut ïa baroh ki nongïalam bamsap kiba ju don mynshwa ha ka seng Congress.
“Ki riewbamsap kiba ju don baroh shikatto ha ka seng Congress mynta ki la leit sha ka UDP bad ki kam ba ki kwah ban leh bha bad ngam tharai ba ki paidbah ruh kin dei ki biej ha kaba kin ai vote ïa ki. Ki lah ban ïoh khring ïa ki nongïalam hynrei ban ïoh ïa ki nongthep vote ka dei ka jingtynjuh kaba khraw bha ïa ki,” u la ong.
