Ha kane ka juk stad Teknoloji kaba mynta ka la long shisha ka kabu ïa kiba bun ki samla donsap ha kaba ha ka jinglut kaba duna eh ki la lah ban pynpaw pyrthei ïa ki jong ki sap ki phong kiba bun phew ne spah jait kiba ki don la ka long ha ka rwai ka siaw, ka put ka tem, ki jingnang ban ak bad pynbyrngia, ki rukom shet jingshet ne shna jingshna, ka shad ka kmen, ka jingieit mariang bad kiwei kiwei. Khamtam lei ha kane ka juk mobile mynta la sakhi ba ki la don bun bah kiba lah ban kamai jakpoh tangba lyngba ka jingshna ïa ki dur khih bad sa pyllait paidbah ïa ki. Ha kine ki sngi la lah ban ïohi shisha ïa ki sap kiba wat ki samla khasi jong ngi ruh kim sahkut shuh hajuh, hynrei kila la ïaroi stet bha ha la ki jong ki jong ki jinglah kiba la pyrshang.
Kawei na ki sap kiba kham long paidbah bha kadei shaphang jong ki kam ïalehkai ne sports kaba long kawei na ki kam kaba khuid kaba suba bad kaba ym don eh kata ka jingleh kaba pyrshan ïa ka imlang sahlang. Hooid lehse ki lah ban don ki jait jingïalehkai kiba ktah, hynrei kumba long hi ka kam ïalehkai ka dei kaba sngewtynnad bad kaba ïabit ïabiang lang da baroh. Ngim lah ban klet ïa u heprit Samborlang Rynjah, uba dang hynriew snem ka rta u la don shisha ïa ka sap ban ap kol ha kaba tang lyngba jong ka durkhih ba la pyllait paidbah, u la lah ban ïoh ïa ka jingithuh ha ki khlur ïalehkai phutbol jong ka pyrthei bad khring ïa ki academy ïalehkai phutbol jong ka ri India.
Lyngba jong ka rynsan Social Media ngi la lah ruh ban ïohi shibun ki sap ki phong ba ki samla Khasi jong ngi ki don bad kumba long ha kine ki sngi ki Khasi jong ngi kim kyrduh shuh wat ban peit ïa ki durkhih pynbyrngia tang ha ka ktien la jong ruh. Da ki bun spah tylli ki phlim bad ki drama lyngkot la lah ban ïohi lyngba jong ka rynsan YouTube ha kine ki sngi. La sakhi ïa shibun ki kynhun kiba la mih shakhmat ban shim ïa ki kam pynmih ïa ki dur khih kum ki kam kamai jakpoh jong ngi bad ym lah ruh ban len ba ki la ïa myntoi shisha shibun.
Ka jingdon jong ka rynsam Social Media ka la ïarap ruh shibun ban pynphriang ïa kiba bun ki khubor ha ki durkhih shaphang ka jonglong jingman jong ka mariang bad ki sawdong sawkun kiba ker ïa ngi. La ïohi shibun ki shnong ki thaw kiba itynnad bad kiba khring na ka bynta ym tang ban leit jngohkai hynrei wat ban leh ruh ïa ki kam shlur bad ki kam kilan met kum kaba leit ïaid kjat bad sah pynngad da ki bun sngi. Khamtam lei ki briew kiba ieit ïa ki kam jngohkai pyrthei ki myntoi shibun eh ban ïohi lyngba ki durkhih bala pynmih da ki samla khasi la jong hi. Ha kine ki sngi la lah ban ïohi ïa shibun bah ki shnong ki thaw bad ki jaka kiba ym pat ju ïohi baroh shi kattto ruh.
Ha kine ki sngi shibun bah ki sap barieh jong ki briew khamtam lei jong ki para Khasi kiba ngi dang lah lehse ban niew ba ngi dang dei ka jaidbynreiw kaba dang sahdien shibun, la lah ban ïohi lyngba jong ka rynsam Social Media. Na ka daw jong ka jingroi stet ba katta katta jong kane ka rynsan la lah ban sakhi ba ka ïew mobile ka dei kawei na ki ïew kiba thnem ne ïaid ïew tam ha kine ki sngi. Ki briew kiba ha ki shnong kyndong katno katno ruh ki ïaleh ïap katba lah bad kot la i bor ban don beit kawei ka Android Mobile khnang ba ki ruh kin lah ban ïa ïoh bynta lem ha kane ka lad jingtip jong kane ka juk.
Hynrei ha ryngkat jong kiba bun ki kam kiba la ai jingmyntoi ïa kiba bun ki don ruh ki kam kiba ktah pat ïa ka jingsngew jong ki katto katne ban ïoh sngew ïa ki jingrwai ba la rwai ha la ka jong ka ktien shnong,hynrei kiba long pynban ki ktien sih tien sang ha ka jaidbynriew Khasi salonsar lang pat. Lehse ki briew kane ka juk mynta kim da sngew pher than eh hynrei hapdeng jong ki longiing kiba dang don bun ki khun rit ki pynpaw ïa ka jingbynniaw jong ki. Uwei u rangbah u la mai ïa kita ki khynnah rit ba ki kren da ka ktien kaba la ju niew ba ka dei ka ktien khlem akor, hynrei kita ki khynnah ki jubab oh kata ka dei ka jingrwai ba la rwai ha YouTube te. Kumta la ki dei ka jaitbynriew kaba tang shitroh, hynrei ngi don pat ïa kata ka jingroi jong ka ktien jong ngi na kawei ka thain sha kawei pat bad kei kaba donkam ka long ba ngin ïohi jinghikai lang ban sngewthuh khambha ïa la ka jong ka imlang sahlang.
