Shillong, Risaw, 29: Ka Khun Hynniewtrep National Awakening Movement (KHNAM) ka la kynnoh ba u Executive Member (EM) uba khmih ïa ka tnat Trade ha Khasi Hills Autonomous District Council (KHADC) u la kam khlem nongrim bad ïalam bakla ha ka jingai jubab dang shen ha ka dorbar tlang jong ka Council kaba la kut noh dang shen.
Katkum ka jingong jong u Working President ka KHNAM u Bah Thomas Passah, u EM u la kam ba ka jingaiwai ïa ki khyrdop lum khajna na ka tnat Trade ka long katkum ki aplikeshon ba la ïoh pdiang na ki riewshimet. Hynrei, ka jubab jong ka Right to Information (RTI) ba la ïoh da ka KHNAM ka pynpaw da kumwei.
Ka jubab RTI, kaba 22 tarik, Nailur, 2025, ka pyni ba na ki 16 ngut kiba thep ïa ki aplikeshon ba la ïoh pdiang da ka KHADC, tang 4 ngut kiba la ïoh ïa ki work order. Hynrei, 6 tylli ki work order la ai sha ki riewshimet ki bym shym la thep wat tang ïa ka aplikeshon.
U Bah Passah u la kynnoh ba ka jubab u EM ka long kaba khlem nongrim bad kaba ïalam bakla bad dawa ruh ba u EM uba khmih ïa ka tnat Trade u dei ban ai jingpynshai.
“Katkum ka jubab RTI ka kdew shai ba 4 tylli ki work order la aiti sha ki riewshimet kiba la aplai bad 6 tylli ki work order ladep ban aiti sha ki riewshimet ki bym shym la aplai kaba pynshisha ba ka jubab jong u EM in-charge Trade hapoh ka iingdorbar ka long kaba khlem nongrim bad kaba ïalam bakla,” u la ong.
“Ngi la aiti ruh ïa ka dorkhas halor kane ka kam bad ngi kyntu ïa u EM uba khmih ïa ka tnat Trade ba un ai jingpynshai bad ngi dawa ba ïa kine ki khyrdop dei ban ai thymmai biang hadien ba la ïaid katkum ka rukom treikam kaba khuid bad kaba shai kaba kynthup naduh ka jingkhot Tender lyngba ki advertisement ha ki kotkhubor bad ka jingbishar ïa ki kot ki sla ba la thep tender lyngba ka open tender system,” la bynrap u Bah Passah.
