Nongstoiñ, Lber 28: Ha ka sngi saitjaiñ jong ka taiew ba la dep ka kynhun jong ki briew sorkar na Assam kiba la kam ba ki dei na ka Survey Department, ki la leit ban sieh ïa ki mawpud ha ki katto katne ki jaka kiba hap ha ka Langpih Sector da kaba sdang na Kampahduli, Nongmawleiñ, Umbyrsit bad kiwei kiwei ki jaka ha ki thaiñ Mawdiangsnam haduh Kyrshai.
Katei ka jingwan sieh mawpud jong kitei ki briew ka sorkar Assam ka lah ban wanrah ïa ka jingklumar bad pynthut ruh wat ïa ka shong suk shong saiñ jong ki paitbah nongshong shnong, ong u bah K.P Pangñiang MLA barim ka Rambrai Jyrngam u ba long ruh u dkhot jong ka Regional Committee on Border Dispute ba la thung da ka sorkar jylla.
U bah Pangñiang haba ïakren bad ki nongthoh khubor ha Langpih, u la ong ba ki Regional Committee jong ka Meghalaya bad Assam kim pat sdang satia ban jurip ïa ka Langpih sector, namar ka jingjurip ïa katei ka sector ka hap ha ka wat kaba ar. Ka jingwan sieh mawpud jong ki briew ka sorkar Assam ka dei ka bym lah ban pdiang. Namar naduh u bnai Naiwieng jong u snem ba la dep na ka liang jong u bad ki paitbah ki la dep phah da ka jingthoh sha ka sorkar ba katba ym pat lah ban pynbeit, kam dei ban don kano kano ka jingthew jaka ne sieh maw pud la ka dei na ka liang ka Assam ne na ka liang ka Meghalaya.
Lyngba katei ka jingthoh la kyntu ruh ïa ka sorkar Meghalaya ba ka dei ban pynssgew sha ka sorkar Assam, ba kam dei ban shah ïa ki briew jong ka ba kin wan thew wan woh ïa ki jaka kiba hap ha katei ka sector, katba ki Regional Committee on Border Dispute kim pat dep ïa ka jing jurip bad kim pat phah ïa ki kaiphod sha ki sorkar jylla.
U bah Pangñiang u la ong ruh ba naduh ka por ba u (L) bah Hopingstone Lyndoh u dang long u CEM bad MLA, ka Langpih ka dei ka madan jong ka jingsdang jong ka jingïakhih ban pynbeit ïa u pud u sam bad da ki spah tylli ki Memorandum la submit sha ki sorkar bapher bapher, hynrei haduh mynta ka jingpynbeit ïa u pud u sam kam pat urlong.
Nalor kata u la ong ruh ba ka jingwan tuklar jong ki briew ka sorkar Assam kam long kaba dei bad ka pynartatien bad pyntharai sniew shibun ïa ki paitbah nongshong shnong bad ka lah ban wan rah ruh ïa ka jingeh. U la kyntu ïa ki nongsynshar shnong bad ki paitbah ba lada ki don ki briew jong ka sorkar Assam, kiba wan rung jubor ha ki shnong ki thaw ban sieh mawpud khlem ka jingiadon lang jong ki heh sorkar na Meghalaya bad Assam, kim dei ban ailad hynrei ki dei ban beh krad ïa ki. Lada ki lap ïa kino kino ki maw pud kiba I suba ba ki dei ki ba la wan sieh jubor da ki briew ka Asssam ki dei ban jynrat naphang.
